Vazhdon procesi i Vettingut ndaj gjyqtarëve dhe prokurorëve në kuadër të Reformës në Drejtësi. Komisioni i Pavarur i Kualifikimit ka shkarkuar ditën e sotme nga detyra gjyqtarin e Apelit të Krimeve të Rënda, Idriz Mulkurti.
Gjyqtari Mulkurti ka munguar në të gjithë procesin, duke mos u paraqitur as në seancën dëgjimore, gjatë së cilës atij iu konstatuan probleme me pasurinë.
KPK konstatoi mungesë burimesh të ligjshme për këstin 20 mijë euro të një apartamenti si dhe shkollimin e të birit në Britaninë e Madhe, ndërkohë që avokati i gjyqtarit të Apelit për Krime të Rënda kontestoi trupin gjykues dhe analizën financiare.
Ai u mbrojt nga avokati Sokol Hazizaj, përballë një trupe të drejtuar nga Lulzim Hamitaj. Komisionere e vettingut ishte Valbona Sanxhaktari dhe anëtare Genta Tafa Bungon. Në rolin e vëzhguesit ndërkombëtar ishte Hans Kijlstra.
Ndërkohë vetëm 4 ditë më parë, ish-gjykatësi Fuat Vjerdha u shkarkua nga posti i tij si kryetar i Gjykatës së Apelit të Shkodrës.