Nga Seth J.Frantzman, “Jerusalem Post”
Vitin e shkuar, Hamasi përdori një mënyrë të re për të terrorizuar Izraelin. Aktivistët dhe mbështetësit e saj, nisën të lidhnin pajisje me lëndë djegëse nëpër balona, duke i lëshuar ato mbi kufirin e Gazës. Në Irak, Shteti Islamik ka djegur shumë fusha të mbjella me drithëra në qendër dhe veri të vendit, për të terrorizuar fermerët irakianë, dhe për të shenjestruar zona të ndryshme, përfshirë atë të Sinjarit, ku jetojnë pjesëtarët e minoritetit Jazid.
Më shumë se 2.000 zjarre janë vendosur në Izraelin jugor, dhe 8.700 hektarë janë djegur midis majit 2018 dhe majit të këtij viti, sipas Qendrës Informative Meir Amit. Përdorimi i balonave për të transportuar materiale djegëse mbi vijën kufitare, është shtuar ndjeshëm.
Kjo është padyshim një strategji inovative e përdorur nga Hamasi, kur kuptoi se protestat e mëdha të muajit mars dështuan, dhe kur aktivitetet e tjera si tunelet nëntokësore, u zbuluan nga autoritetet izraelite të sigurisë. Nuk janë të qarta marrëdhëniet mes ISIS dhe Hamasit, në këtë lloj taktike, por grupimet e dikurshme ekstremiste, kanë kopjuar taktikat e Hamasi në mbarë rajonin dhe në botë.
Për shembull sulmet kamikaze, shpërthimet, sulmet ajrore, goditjet në masë dhe sulme të tjera u bënë metoda të zakonshme sulmi ndaj Izraelit, para se të bëheshin aq shumë të zakonshme jashtë vendit. Mijëra hektarë me të korra janë djegur në Irak dhe Siri gjatë muajve të fundit, qëkur ISIS nisi përdorimin e zjarreve si një lloj arme.
Në muajin maj anëtarët e ISIS-it u infiltruan në fshatrat pranë Makhmur, një zonë e ekspozuar pasi gjendet përgjatë vijës kufitare me rajonin autonom të Kurdistanit, dhe ku ekziston një hendek midis tyre dhe forcave të ushtrisë irakiane. ISIS e shfrytëzoi atë hendek, dhe nisi kërcënimin e fermerëve. Grupimi u kërkoi fshatarëve taksa, në të kundërt i kërcënoi me djegien e fushave të tyre të mbjella.
Pas atyre incidenteve, ISIS filloi gjithsesi fushatën e djegies të tokave me të mbjella. Ai ka goditur kryesisht në Irakut qendror dhe verior, zakonisht pranë zonave që i kontrollonte dikur vetë. Gjatë kësaj fundjave, ISIS u akuzua për vendosjen e zjarreve pranë Sinjarit, një zonë ku jeton komuniteti Jazid.
Në vitin 2014 ISIS e sulmoi atë zone, duke kryer një masakër të madhe. Më shumë se 3.000 persona, rezultojnë ende të zhdukur. ISIS dëshiron të tregojë se aty ku ka ende forcë, siç ndodhi në Siri në muajin mars, gjenocidi i tij do të vazhdojë, çka pengon kthimin e pakicave në tokat e tyre.
Shuma e përgjithshme e tokës së djegur në Irak, mendohet të jetë më shumë se 8.000 hektarë. Fermerët, po humbin gjithçka që kanë për të siguruar mbijetesën e tyre. Deri tani, Iraku nuk ka dot një mënyrë për t’u përballur me zjarret. Vendi është ende duke e marrë veten nga ISIS, dhe shkatërrimet që grupimi solli në vend gjatë viteve 2014-2018.
Qytete si Mosuli, kërkojnë investime të mëdha për rindërtimin. Sidoqoftë, ISIS synon të godasë popullatën më të ndjeshme në fshat, aty ku siguria është ende e vështirë për t’u imponuar në vende si Niniva, dhe midis Kirkukut dhe Makhmurit, ose pranë Kakinçinit.
Synimi i Shtetit Islamik, është t’u pamundësojë një jetesë normale njerëzve në zonat rurale, dhe t’i mbajë ata vazhdimisht në ankth. Banorëve të zonës që kanë pikëpyetje nëse ISIS do të rikthehet, dhe që mbështesin qeverinë qendrore, po u dërgohen mesazhi se Shteti Islamik po rikthehet./ Përktheu për Tirana Today, Alket Goce
