Washingtoni zyrtar i ka dërguar një ultimatum Turqisë, duke e vendosur përballë dy zgjedhjeve, të vazhdojë me blerjen e sistemit rus të mbrojtjes raketore S-400, ose ta pezullojë atë për të blerë 100 avionët luftarakë amerikanë F-35.
Ndërkohë që për të vendosur në lidhje me këtë çështje, Patrick Shanahan i jep kohë homologut të tij të marrë vendim deri në fund të korrikut. “Turqia nuk do të marrë F-35-at, nëse merr S-400-at. Keni ende mundësinë për të ndryshuar kursin për S-400-ën”.
Pentagoni ka argumentuar se nëse avionët F-35 fluturojnë brenda rrezes së radarëve të sistemit S-400, rusët mund të grumbullojnë fshehurazi informacione për pjesë të veçanta të avionëve ushtarakë amerikanë.
Megjithatë Presidenti turk Regep Taip Erdoan e ka bërë të qartë vendosmërinë për t’a çuar deri në fund instalimin e sistemit rus të mbrojtjes ajrore në Turqi. Erdoan është shprehur më herët se amerikanët nuk kanë qenë të gatshëm për t’u shitur turqve sistemin raketor “Patriot”.
