Pranoi mandatin dhe hyri në Kuvend për të përfaqësuar zgjedhësit e tij, por sot deputeti Lefter Maliqi bën thirrje që të shpërndahet parlamenti dhe të mbahen zgjedhje të parakohshme.
Deputeti Maliqi ka reaguar në një postim në Facebook, lidhur me përgjimet e publikuara nga Bild, ku shprehet se këto të fundit dëshmojnë se çdo institucion ka rënë dhe se e ardhmja e Shqipërisë është në rrezik.
“Shqiptarët të marrin në dorë o sot o kurrë fatet e vendit, protesto fuqishëm kundër krimit të organizuar dhe mos u ndal për drejtësi”, shkruan ndër të tjera Maliqi.
Reagimi i plotë:
Parlamenti duhet të shpërndahet. Vendi të kalojë në zgjedhje të parakohshme. Përgjimi i shitblerjeve të votave, ndërhyrja e grupeve kriminale tregon se deputetët, drejtorët,kryetarët e Bashkive etj zgjidhen, vendosen dhe emërohen nga krimi. Çdo institucion ka rënë. Jemi në dorë të krimit, paaftëve, servilëve, oligarkëve. Shkaku është sistemi i kalbur elektoral, korrupsioni dhe krimi i organizuar. E ardhmja e vendit është në rrezik, jemi të pasigurt nën kthetrat e krimit. Shqiptarët të marrin në dorë o sot o kurrë fatet e vendit. Protesto fuqishëm kundër krimit të organizuar, mos u ndal për drejtësi, për votë të lire, për të ardhmen e sigurt.
