Gjatë fjalës së tij para qytetarëve kurbinas, kryedemokrati Basha u shpreh se nuk ka asnjë ndryshim pa largimin e kryeministrit Rama, dhe zhvillimit të zgjedhjeve të lira e të ndershme.
Ai tha se jemi i vetmi vend në Evropë që kapet kryeministri me kriminelët, por ai nuk largohet. Po sipas kreut të PD-së, Rama mbështet trafikantët, dhe as nuk e mendon që të lë pushtetin. Po kështu, për karrigen e tij, refuzon ti hapë rrugë zgjidhjes politike.
“Jemi i vetmi vend në Europë, që kapet kryeministri duke futur kriminelët në Parlament, e nuk largohet. Jemi i vetmi në Evropë që ministri kapet në trafik droge, e nuk largohet. Jemi i vetmi vend ku kryeministri del përkrah një përdhunuesi si Elvis Roshi e nuk largohet.
I vetmi vend ku kapet duke vjedhur votat me Dakon e Gjiknurin, e nuk largohet. Duhet të ishte larguar qindra herë për të zezat që i ka bërë vendit. E tani për karrigen e tij refuzon ti hapë rrugë zgjidhjes politike, e hapjen e negociatave.
Ka vetëm një përgjegjës që sa herë ka patur mundësi të zgjedhë shqiptarët, apo oligarkët dhe kriminelët ka zgjedhur të jetë kundër shqiptarëve. Asnjë ndryshim nuk do të ketë në ekonomi, asnjë vend pune nuk do hapet pa zgjidhur problemin e problemeve, pa e lidhur fatin e Parlamentit dhe qeveritarëve të ardhshëm drejtpërdrejt me votën e qytetarëve shqiptarë. Kjo është beteja, zgjedhje të lira e të ndershme e largimi i Edi Ramës”, deklaroi Basha.
