Rreth një vit më parë në kryeqytet u ekzekutua Marjo Majollari. Për vrasjen në fjalë u arrestua Kastriot Gjuzi i cili dyshohej se kishte kryer krimin për motive hakmarrje. Por ditën e sotme prokuroria nuk ka asnjë të dyshuar dhe të arrestuar. Gjykata ka miratuar kërkesën e akuzës për pushimin e hetimeve për shkak të mungesës së provave ndaj Gjuzit i cili tashmë ka fituar lirinë.
Në përfundim të seancës për pushimin e hetimeve nëna e Majollarit ka hedhur akuza ndaj gjykatës e prokurorisë duke deklaruar se do ankimojë këtë vendim, raporton Report Tv.
“Shteti i doli për zot djalit tim dhe e ktheu, prisja më shumë. Nuk kam marr avokat por do ta ankimoj çështjen. Ky ishte shteti që ma ktheu, që i doli për zot që ka sigurinë, është ky shtet që ma vrau dhe po mbron kriminelin. Këta janë të gjithë të korruptuar, çfarë drejtësie është kjo.
Jam thirrur vetëm njëherë nga Prokuroria dhe jam thirrur për herë të dytë kur m’u dha dosja, nuk kam mundur ta lexoja të gjithën por i pyeta se çfarë përmblidhte. Më thanë që është sekuestruar arma. Djalin e kam pasur flori, shihte punën e vete, hallin e vet, i vetmi faji ishte që kishte atë mbiemër dhe atë gjak.
Ka qenë punëtor. Ku është drejtësia, ku është shteti që ka bërë Edi Rama?” tha ajo.
Historia e hakmarrjes:
Ngjarja dyshohet se kishte prapaskenë hakmarrjen, pasi babai i Marjos ka vrarë në vitin 2010 vëllanë e Gjuzit.
Marjo Majollari duket se e parandiente një hakmarrje të mundshme, pasi në 2015-tën, një vit pas arrestimit të të atit të tij kishte shkuar për të kërkuar azil në Suedi.
Pas refuzimit të kërkesës për azil, ai u kthye në Shqipëri dhe jetonte vetëm me të ëmën pasi ishte djalë i vetëm.
Avni Majollari jetonte prej 14 vitesh në arrati, edhe pse i dënuar me burgim të përjetshëm për vrasje të dyfishtë.
Policia e Tiranës e arrestoi në vitin 2014 në rrugën “Ibrahim Brahja” në kryeqytet. Në momentin e arrestimit, 44-vjeçari, banues në Tiranë u kap edhe me armë pistoletë në brez, kurse në banesë iu gjetën një automatik, një tjetër pistoletë dhe sasi municioni që u sekuestruan si prova materiale.
