Mesfushori kroat i Barcelonës, Ivan Rakitiç deri pak ditë më parë ishte i lidhur me rinovimin e katalanasve. Zërat e merkatos për yllin kroat janë shtuar dhe ekipi më i interesuar është Interi në Itali.
Presidenti Josep Maria Bartomeu nuk ka qenë mjaft i bindur për të rinovuar me Rakitiç, por ndërhyrja e trajnerit bëri që rrugët të bashkoheshin pavarësisht kërkesës për rritje rroge, nga 5.5 milionë euro që fiton aktualisht.
Por eliminimi turpërues nga Champions League ka bërë që gjërat të marrin një rrugë tjetër dhe e ardhmja e kroatit tashmë duket se është e destinuar larg La Ligas.
“La Gazzetta dello Sport” ka renditur tre arsye se pse Rakitic do të kalonte tek Inter në merkaton e verës.
- Gruaja e tij, Raquel, pëlqen Milanon si qytet dhe është një mundësi e mirë edhe për të duke qenë se është modele.
- Paga e tij do të ishte 6.5 milionë euro, aq sa ka kërkuar kroati.
- Vullneti i Barcelonës për ta shitur.
Duke u nisur nga këto fakte, 31-vjeçari do të preferonte të vishej zikaltër, i ndikuar edhe nga kontrata e tij 2-vjeçare me opsion rinovimi edhe për një vit. Klauzola e largimit të tij është 125 milionë euro, por Rakitic do të shitej për një shifër deri në 50 milionë euro. Gjithsesi gjithçka do të lidhet me të ardhmen e Valverde.
