Nga Alket Goce
Mbështetësit e opozitës, janë thirrur sot në protestën e radhës të madhe në Tiranë. Lideri demokrat, Lulzim Basha, premton për të disatën herë, se ky tubim do t’i japë goditjen fatale qeverisë. Ultimatumet me tone kërcënuese, përdoren shpesh si “viagra”, për të mbajtur gjallë entuziazmin e militantëve. Këta duhen patjetër për të mbushur sheshet, sa herë që kanë nevojë liderët e partive. Më pas shndërrohen në “hallexhinj” të bezdisshëm, që duhen sistemuar diku në punë.
Por për momentin, edhe vetë Basha e di se qeveria nuk do të bjerë brenda disa javësh. Sfida kryesore, për të dyja palët është 30 qershori. Qeveria zotohet të hyjë në zgjedhjet lokale, përballë opozitës së re. Basha përbetohet se nuk do të lejojë të ketë zgjedhje pa PD. Monika Kryemadhi dhe Sali Berisha, kanë një “vizion” më të qartë se si të pengojnë mbajtjen e këtyre zgjedhjeve, që duket se kanë edhe bekimin e ndërkombëtarëve. Ata paralajmërojnë shpërthimin e një ‘97 tjetër. Nën këtë klimë, ajo që do vazhdojë të humbasë është mbarë Shqipëria.
BE e ka gati alibinë, për të justifikuar mosçeljen e bisedimeve të anëtarësimit në qershor. Dhe në varësi të zhvillimeve brenda unionit, pas zgjedhjeve evropiane në fund të këtij muaji, mund të hezitojë ta bëjë këtë edhe në shtator. Kriza politike, e imponuar nga opozita dhe skandalet korruptive qeveritare, e kanë mpirë jo pak nervin e mazhorancës.
Muajt e fundit, prioritet për të është jo qeverisja, por ruajtja e sigurisë publike, dhe mosdalja e vendit nga binarët. Kjo situatë, po streson dhe neverit shumë qytetarë, të cilët po bëhen edhe më abstenues ndaj të dyja palëve. Numri i atyre, që duan të ikin një orë e më parë nga ky vend, do të shtohet. Mjerisht, nuk ka ende asnjë alternativë serioze në horizont, ndërsa BE-ja na i ka përplasur derën në fytyrë./ Tirana Today
