Liderët e Ballkanit janë mbledhur sot në Tiranë në kuadër të procesit të samitit të Brdo-Brijunit. Në këtë samit morën pjesë me ftesë të presidentit Meta, presidenti i Kosovës Hashim Thaçi, Presidenti i Malit të Zi Milo Gjukanoviç, Presidenti i Maqedonisë së Veriut Gjorge Ivanov, presidenti i Serbisë Aleksandër Vuçiç, presidentja e Kroacisë Kolinda Grabar-Kitarovic dhe Milorad Dodik i Bosnje-Hercegovinës.
Ndërsa të ftuar nderi janë edhe shefja e politikës së Jashtme të Bashkimit Europian, Federica Mogherini dhe Presidenti i Polonisë, Andrzej Duda.
Fotot dëshmojnë klimën të tensionuar në rajon, kryesisht mes Vuçiç dhe palës kosovare.
Presidenti i Serbisë ka postuar një foto teksa bisedon në një tavolinë me liderin e serbëve të Bosnjës, Milorad Dodik. Madje, këtë foto, Vuçiç e ka përshkruar si “takimi vëllazëror në Tiranë”.
Më poshtë në këto foto, shihet qëndrimi i Vuçiç me pjesëmarrësit në këtë Samit dhe shtrëngimi i sforcuar i duarve me Hashim Thaçin në praninë e Federica Mogherinit.
Një moment tjetër pikant është kur Vuçiç refuzon të fotografohet me presidentin Meta, Kolinda Grabar-Kitaroviç dhe Andrzej Dudan. Ky vepim duket i qëllimshëm nga ana e presidentit serb në lidhje edhe me qëndrimet e mbajtura nga palët për çështjen e Kosovës.
