Shtyhet sërish gjyqi ndaj Ritvan Zykajt, autorit të masakrës së Selenicës që u mori jetën 8 personave nga i njëjti trung familjar. Shkak për shtyrjen e seancës është bërë mosformatimi i trupit gjykues, ndërsa seanca e radhës është caktuar më 4 Qershor.
Zykaj është sjellë në gjykatë, por nuk është futur në sallën e gjyqit, duke e larguar pas disa minutash. Të pranishëm në gjykatë kanë qenë edhe gjyshi dhe xhaxhai i Zykajt, të cilët kanë refuzuar të flasin para kamerave.
Jashtë kamerave, ata kërkojnë dënimin e Ritvanit, ndërsa shtojnë se s’kanë përse të vijnë në gjykatë.
“Nuk e dimë ku kanë shkuar familjarët e tjerë. Dhe nuk e dimë pse na sjellin në gjykatë. Të marrë dënimin që meriton. Nuk e kemi takuar dhe nuk kemi pse ta takojmë. Na mbylli dyert, të dënohet. Ne nuk kemi pse vijmë në gjykatë”, ka thënë jashtë kamerave gjyshi, i cili është i vetmi që ka mbetur në fshatin Resulaj të Selenicës.
