Ministrja e Arsimit, Besa Shahini, me një shkresë zyrtare vendosi pezullimin e rektorit të Universitetit të Tiranës, Mynyr Koni, dhe kërkoi nga presidenti Ilir Meta firmosjen e shkarkimit të tij.
Pas kësaj kërkese, një reagim është përcjellë nga presidenti Meta, i cili pasi ka shqyrtuar propozimin e ministres, ka vendosur rrëzimin e propozimit.
Njoftimi
RRËZIMIN E PROPOZIMIT TË MINISTRIT TË ARSIMIT, SPORTIT DHE RINISË PËR SHKARKIMIN NGA DETYRA TË REKTORIT TË UNIVERSITETIT TË TIRANËS, Z. MYNYR KONI
Në mbështetje të neneve 57 pika 7, 92/g, 93, të Kushtetutës, nenit 39, pika 8, 10 të ligjit nr.80/2015 “Për arsimin e lartë dhe kërkimin shkencor në institucionet e arsimit të lartë në Republikën e Shqipërisë”, ligjit nr. 44/2015 “Kodi i Procedurave Administrative i Republikës së Shqipërisë”, pasi shqyrtova propozimin e Ministrit të Arsimit, Sportit dhe Rinisë me nr.4158/2 prot., datë 12.04.2019, administruar në Institucionin e Presidentit të Republikës me nr.1169 prot., datë 15.04.2019,
Dekretoj;
Neni 1
Rrëzimin e propozimit nr.4158/2 prot, datë 12.04.2019, të Ministrit të Arsimit, Sportit dhe Rinisë, për shkarkimin nga detyra të Rektorit të Universitetit të Tiranës, z. Mynyr Koni, sipas arsyetimit bashkëlidhur këtij dekreti.
Neni 2
Vijimin e ushtrimit të detyrës nga Rektori i Universitetit të Tiranës, z. Mynyr Koni, sipas Dekretit të Presidentit të Republikës nr.9609, datë 26.05.2016.
Neni 3
Ky dekret hyn në fuqi menjëherë.
Nr. Dekreti 11183
Tiranë, më 06.05.2019
Pezullimi i tij ishte njoftuar më herët edhe nga kryeministri Rama, i cili u shpreh gjatë një takimi me studentë dhe pedagogë se Koni nuk ka mbajtur përgjegjësitë që i takojnë në raport me problemet e studentëve.
Ai tha se pas protestës së studentëve, çdo gjë ka lëvizur përveç xhaketës së rektorit, që sipas tij, ai vijon që të mos ketë asnjë shqetësim edhe pse pjesa më e madhe e kërkesave të studentëve është përgjegjësi e rektoratit, bazuar te autonomia.
Vetë rektori Mynyr Koni iu përgjigj akuzave të kryeministrit përmes një letre të gjatë, duke i cilësuar kritikat e tij si sulm tendencioz dhe të paprecedentë, pasi sipas tij, vetëm ai po sulmohet nga të gjithë rektorët.
