Sindikalisti Fiqiri Xibri ka folur për protestën e minatorëve që do të mbahet ditën e nesërme në orën 10:00, para godinës së Kryeministrisë.
I ftuar në rubrikën “Opinion”, Xibri ka dhënë disa detaje, duke theksuar se protesta do të zhvillohet me disa skenarë, ndërsa u shpreh se njëra prej tyre mund të jetë vendosja e 5 arkivoleve, të cilët, sipas tij do simbolizojnë institucionet përgjegjëse që kanë harruar minatorët.
“Kostoja e statusit të minatorit është e lartë. Akoma zero punë për këtë çështje. Sot jemi në luftë me qeverinë. Nesër kemi disa skenarë për këtë protestë. Një skenar do të jetë vendosja e disa arkivoleve në shenjë simbolike, që do personifikojnë disa institucione.
Minatorët i kanë dhënë shumë vendit, politikanët duan të na sorollasin. Kemi qenë gjithmonë në një mendje. S’mendoj se janë më shumë se 6000 minatorë. Policia e Shtetit është njoftuar për protestën. Ky është një shtet që nuk funksionon. Ka mijëra e mijëra pensione false, çfarë bën shteti këtu?”, tha ai.
