Bashkëshortit të ish-ministres socialiste, Ermonela Felaj, aktualisht deputete është emëruar prokuror pranë Prokurorisë së Shkallës së Parë në Tiranë. Ish-deputeti i Partisë Demokratike, Enkelejd Alibeaj ka reaguar për këtë emërim dhe e ka cilësuar si antikushtetues, pasi Bledar Valikaj është emëruar si prokuror ndonëse nuk është magjistrat.
Po ashtu sipas tij, Kushtetuta detyron të emërohen prokurorë vetëm ata që e kanë kaluar vettingun, por ky nuk është rasti i burrit të Felajt. “Ai as vettingun nuk e ka kaluar”,- siç sqaron demokrati.
“Nëse vettingu u bë për të emëruar pa vetting dhe në mënyrë jo kushtetuese burrin e Ermonela Felajt atëherë ajo ia ka arritur qëllimit. Që sot Edi Rama ka në drejtësi një ushtar tjetër, burrin e deputetes së tij”,- vijon Alibeaj.
Sipas Alibeajt, kjo është arsyeja që shqiptarët nuk besojnë tek drejtësia e vettingu. Valikaj u caktua prokuror pranë Prokurorisë së Shkallës së Parë Tiranë, në mbledhjen e datës 25 mars të KLP-së. Ky është vendimi i Gjykatës Administrative, e cila ka urdhëruar KLP të emërojë prokuror bashkëshortin e ish-ministres Bledar Valikaj.
