Ndonëse 1 muaj me vonesë, Kuvendi i Shqipërisë publikoi përfitimet financiare të deputetëve për periudhën janar-shkurt, së bashku me pagat e tyre mujore.
Gazeta “Panorama” zbardh listën e përfitimeve financiare të ligjvënësve për muajin shkurt dhe bonuset e fundit shtetërore, që ish-deputetët e Partisë Demokratike dhe të Lëvizjes Socialiste për Integrim kanë përfituar nga buxheti i shtetit.
Për këtë muaj, Kuvendi është kujdesur që t’ua ndërpresë menjëherë trajtimet financiare ish-ligjvënësve demokratë që në momentin e depozitimit të dorëheqjeve në Kuvend. Ndërsa për muajin mars dhe prill, ish-deputetët e Kuvendit do të përfitojnë vetëm pagën e plotë, sipas ligjit për statusin e deputetit, ndërsa bonuset si shpenzime për karburant, hotele, dieta apo edhe rimbursim qiraje, nuk do të marrin.
Ajo që bie në sy nga përfitimet është pagesa e honorarëve për deputetët, që zyrtarisht janë të vetmit “punonjës” buxhetorë publikë, të cilët përfitojnë nga orët e punët jashtë orarit zyrtar, pasi pjesa tjetër e punonjësve publikë nuk e përfitojnë. Në listat zyrtare të publikuara nga Kuvendi bien në sy përfitimet e para që kanë marrë si deputetë ish-ministrat e kabinetit qeveritar ‘Rama’, ku për muajin janar këto shpërblime ishin tepër të vogla në krahasim me kolegët e tyre.
Kjo, pasi ata filluan të ushtronin mandatin e deputetit në mes të muajit janar, sepse më parë trajtoheshin financiarisht si ministra. Nga radhët e ish-deputetëve të PD-së bien në sy rimburismet e qirasë. Janë tre ish-deputetë, që merrnin rreth 30 mijë lekë në muaj për rimbursim qiraje.
Konkretisht, bëhet fjalë për Nard Ndokën, Izmira Ulqinakun dhe Nadire Meçorapajn. Këtë bonus e kanë shfrytëzuar edhe disa deputetë të PS-së, të cilët nuk kanë shtëpi në kryeqytet, si Pendavinj, Leka, Bushaj, Bode, Nasufi, Velaj, Harusha dhe Mesi. Kuvendi ka paguar edhe fjetjet në hotele për disa ligjvënës. Vilma Bello e PS-së ka përfituar 90 mijë lekë rimbursim për dy muajt e parë, ndërsa Tritan Shehu 3 mijë lekë.
Edhe ish-deputeti Xhemal Gjunkshi ka përfituar 18 mijë lekë nga rimbursimi i fjetjes në hotele. Për sa u përket pagave, Kuvendi u ka dhënë një rrogë të reduktuar deputetëve të PD-së, kjo për shkak të mosfrekuentimit të komisioneve apo seancave plenare në dy muajt e parë të vitit. Deputetët që kanë përfituar edhe dietat më të larta për muajin shkurt ishin Almira Xhembulla, e cila ka marrë rreth 140 mijë lekë dhe Dritan Bici, me 150 mijë lekë.
Nga kampi i opozitës, kryetari i PD-së ka përfituar rreth 37 mijë lekë bonuse, ndërsa Monika Kryemadhi ka përfituar më shumë, 40 mijë lekë. Ish-kryetari i PD-së, Sali Berisha, ka marrë të njëjtën shumë parash si përfitime sa Basha.
Ndërsa kreu i Kuvendit ka përfituar rreth 54 mijë lekë vetëm për pjesëmarrjen në seanca plenare, pasi bonuset e tjera i përfiton nga Garda e Republikës./ Panorama
