Ministrja e Arsimit, Besa Shahini, ka pezulluar nga detyra mësuesen Bedrie Kastrati në shkollën “Bajram Curri” në Kukës, pas pamjeve filmike të denoncuara në emisionin “Stop” në “TV Klan”. Mësuesja në fjalë jo vetëm që përdorte një fjalor rruge, por edhe dhunonte nxënësit gjatë procesit mësimor.
Ndodhur në këto kushte, ministrja Besa Shahini ka pezulluar nga detyra mësuesen e shkollës 9-vjeçare “Bajram Curri” në Kukës, Bedrie Kastrati. Masa ndaj mësueses vjen pasi emisioni “Stop” denoncoi dhunën verbale dhe fizike që Kastrati ushtronte ndaj nxënësve të saj. Sjellje të tilla, thotë ministrja Shahini përmes një postimi në Facebook, janë të patolerueshme.
“E kam të pamundur të toleroj çdo lloj forme të dhunës ndaj nxënësve apo mësuesve brenda shkollave, qoftë kjo dhunë fizike, verbale apo psikologjike.
Gjuha me të cilën mësuesja i referohet nxënëses dhe dhuna e përdorur në shkollën 9-vjeçare “Bajram Curri” në Kukës, nuk lë vend për justifikime.
Që sot, mësuesja është pezulluar dhe ndaj saj po merren urgjentisht masa. Falenderoj emisionin “Stop” që e solli rastin në vëmendjen e autoriteteve”, shkruan ministrja në Facebook.
