Shkodrës nuk i ndahen skandalet, këtë herë në futboll. Pas Ernest Gjokës, kësaj here preh e kërcënimeve kanë rënë trajneri aktual Agim Canaj, drejtori teknik Firat dhe administratori i Vllaznisë Suad Lici.
Kërcënimet kanë ardhur në lidhje me ecurinë e skuadrës, por edhe për futbollistë të caktuar, për të cilët Licit i është kërkuar që të aktivizohet patjetër në formacion.
Menjëherë pas kësaj situate të pakëndshme, administratori ka njoftuar, kryebashkiaken Voltana Ademi, e cila është njëkohësisht dhe presidentja e klubit, teksa është vendosur pezullimi i seancës stërvitore, e cila ishte planifikuar të zhvillohej në orën 11:30.
Ademi ka thirrur drejtuesit në një mbledhje urgjente, trajnerin Canaj, administratorin Lici si dhe drejtorin sportiv Firat për të diskutuar rreth kësaj ngjarjeje të shëmtuar. Pritet që në minutat në vazhdim, klubi të dalë edhe në një reagim zyrtar.
Kjo nuk është hera e parë që te Vllaznia kërcënohen drejtuesit apo jepen urdhra për të aktivizimin futbollistë të rinj, ndërkohë që në vitin e kaluar u sulmua fizikisht edhe ish-trajneri Ernest Gjoka.
