Kreu i Partisë Demokratike, Lulzim Basha pas takimit me banorët e Malësisë së Madhe ka zhvilluar një takim në qytetarët e Shkodrës, ku akuzoi deputetin e PS, Paulin Sterkaj, se është kapur duke vjedhur vota.
Sipas Bashës, Sterkaj ndodhet në dosjen ‘184’ së bashku me Ymer Lalën, babain e deputetes Reme Lala, duke vjedhur vota në Dibër.
“Në Dukagjin kemi deputet një ish-trafikant që pastaj është veshur me uniformë policie dhe është kapur pastaj në dosjen 184, duke bërë pazare me Ymer Lalën për të vjedhur bashkinë e Dibrës. Shqipëria e transformuar, Shqipëria e ndryshuar është kjo Shqipëri që do u takojë Elvis Dedëve (një i ri i pranishëm në takim) dhe qindra të rinjve dhe jo Paulin Sterkajve dhe një grushti tjetër kriminelësh që i bëjnë duanë Edi Ramës nga mëngjesi deri në darkë”, u shpreh Basha.
Ndër të tjera, Basha siguroi qytetarët e Shkodrës se platforma e parë e PD kur të vijë në pushtet, është shkëputja e lidhjes së krimit me qeverinë dhe se ata do ti rikthehen jetës normale pa pasur frikë nga bandat e lidhura me pushtetin.
