Kryeministri Edi Rama e ka nisur fjalën e tij në Kongresin e Partisë Socialiste duke folur për Tiranën e para katër viteve. Teksa vuri në dukje ndryshimet e bëra gjatë mandatit të Veliajt, kryeministri krahasoi punën e paraardhësve të tij, pra demokratëve dhe atë të bërë nga kryebashkiaku.
Teksa pranoi se ka ende shumë për të bërë, kryeministri tha se puna në kryeqytet ishte edhe falë bashkëpunimit me qeverinë, ndërsa tha se bashkitë e disa qyteteve kanë qenë të bllokuara nga qeveria Berisha.
Duke përmendur disa nga synimet e Bashkisë për transformimin më tej të Tiranës, Rama kërkoi mbështetjen e qytetarëve për të vijuar këto ndryshime, ndërsa përmendi bashkinë e Shkodrës, Kukësit dhe Lezhës, të cilat sipas tij, humbën 4 vite kot.
“Kthejini sytë 4 vite më parë. PD si sheshi i vjetër në qendër. Kjo Tiranë që kemi sot s’ka asnjë lidhje me atë që patë me sytë e kujtesës, ky qytet sot është mishërimi i forcës shumë transformuese. Është pasqyrë e dëshirës sonë për të bërë këtë ndryshim. Është një provë e dallimit të madh si nata me ditën mes nesh dhe atyre që i kemi çdo ditë e më mbrapa. Pa diskutim dita jonë mund të jetë më e mirë dhe do të jetë shumë më e mirë. Tirana jonë sot ashtu si çdo qytet tjetër që ne qeverisim, s’ka të krahasuar me çka ishte para se ne ta merrnim në dorë. Kjo ditë do të kishte shumë më pak dritë dhe për këtë mjafton t’i kthejmë sytë pas te Durrësi, Elbasani, Korça dhe Fieri kur ishim në krye të bashkive por nuk ishim në qeveri. Qytete të bllokuara, qeveria mbante në kthetra të gjithë fuqitë transformuese të Shqipërisë. Sot duhet të hedhim vështrimin përpara, te diferenca e madhe mes realitetit të sotëm dhe ambicies së madhe për Tiranën dhe Shqipërinë që duam. Muzeu historik është ende një fantazmë e së shkuarës, opera një kantier që këtë vit do i hapë dyert. Teatri i kukullave është nja karakatinë që na turpëron para fëmijëve tanë. Le ta bëjmë teatrin e ri kombëtar një vepër të transformuar ashtu si arenën kombëtare. A doni të ndryshojë edhe Shkodra, edhe Kukësi dhe Lezha? Mos i humbisni edhe katër vite të tjera kot!”/ Tirana Today
