“Makina dhe celulari janë mjet pune”, kështu shprehet një 60-vjeçare nga fshati Komsi i Burrelit, e cila i bën ‘zborin’ fuoristradës.
Fidanja e nget vet fuoristradën të cilën ia ka dhuruar i vëllai, duke u shndërruar në frymëzim për shumë femra.
60 vjeçarja shprehet se përmes makinës ka mundur të kryejë mjaft punë dhe se falë vullnetit të saj, ka mundur të përvetësojë në përdorim një pjesë të konsiderueshme të pajisjeve elektronike.
‘’Kam rritur 7 fëmijë pa borxhe, makinën ma solli vëllai së bashku me çelësat, dhe më tha ndaç mësoje ndaç jo. Kam bërë kurs në Peshkopi dhe tashmë jam mësuar me rrugën. Makina dhe telefoni janë mjet pune, po hipe në makinë duhet ta kesh mendjen në mësim se je me automatik në dorë”, shprehet Fidania.
Fidania tregon që nuk e mendon jetën e saj jashtë shtetit, pavarësisht se një pjesë e mirë e të afërmve të saj janë jashtë vendit. 60-vjeçarja u shfaq në rubrikën “Njerëz të padukshëm” që transmetohet në ERTV, si një personazh i pazakontë.
