Këto orë kanë qenë tejet intensive për Rudina Hajdarin, e ndërsa ende nuk ka dhënë verdiktin e saj për mandatin, ndonëse opozita është shprehur me një vendim të formës së prerë. Shumë pikëpyetje janë ngritur, nëse PD do të veprojë me të si në rastin e Myslym Murrizit. Për të qartësuar këto zëra, ajo një ditë më parë pasqyroi vendimmarrjen e saj, ndërsa vë në dukje se është konsultuar me personalitete politike të Bashkimit Evropian dhe Shteteve të Bashkuara të Amerikës.
Mjaft e kujdesshme në mesazhin e saj, duke përzgjedhur fjalët e duhura, Rudina Hajdari citon ndër të tjera se mandatin e deputetit nuk e ka konceptuar kurrë si “një mjet të interesit vetjak, i cili nuk duhet dorëzuar kurrsesi”.
Por pas këtij qëndrimi publik, një reagim është përcjellë nga qytetarët, të cilët e kanë vënë me ‘shpatulla pas murit”. Disa prej tyre i vënë në dukje se mandatin nuk e ka fituar me meritat personale, dhe se me këtë gjest ajo po bëhet fasadë e qeverisë.
Të tjerë i kërkojnë që të mos tradhëtojë demokratët, e mbi të gjitha të mos turpërojë simbolin e demokracisë, Azem Hajdarin.
