Zyrtarisht, deputetët e opozitës kanë djegur mandatet e tyre. Të shoqëruar nga mijëra simpatizantë, ata dorëzuan mandatet e tyre në Kryesinë e Kuvendit. Përpos Myslym Murrizit, Rudina Hajdarit dhe Lefter Kokës, të gjithë deputetët opozitarë u bënë pjesë e vendosjes së këtij precedenti. Akualisht, ku ndodhen këta personazhe të cilët dolën jashtë vendimit të përbashkët të grupit?
Rudina Hajdari ndodhet në Bruksel, për të biseduar për hapat e mëtejshëm të vendit, në rrugën drejt BE-së. Ajo mungoi në mbledhjen e PD-së, kur deputetët e tjerë ishin prezentë për hedhjen e firmës.
Deputeti tjetër, Myslym Murrizi, sikundër Hajdari nuk ka qenë i pranishëm në mbledhjen e PD-së, kur është vendosur për mandatet. Ende nuk ka një reagim në mënyrë zyrtare nga ana e tij.
Deputeti i LSI-së, Lefter Koka, e ka shprehur hapur qëndrimin e tij se nuk do të djegë mandatin që ia ka dhënë populli. Nga ana tjetër, Kryemadhi nuk e ka mirëpritur mirë këtë vendim. Ja se çfarë ka thënë ajo në një intervistë të dhënë së fundmi.
Znj Kryemadhi, a ka deputetë të tjerë të LSI-së, përveç z. Koka në listat që pasojnë deputetët aktualë që mund të largohen drejt mazhorancës? A keni ju një komunikim me ta?
Grupi teknik po punon, por këtu nuk është çështje deputeti, këtu është çështje fryme. Kush deputet do të përfundojë në kazan të plehrave si ato të Ukrainës, le ta provojë. LSI-në, opozitën nuk i mbajnë peng as inceneratorët, as tenderat, as Vettingu dhe asgjë tjetër. Faleminderit.
