Në limitin e kohës, kur ka mbetur vetëm një ditë nga përfundimi i afatit për aplikimet në strukturën e Prokurorisë së Posaçme (SPAK), kanë aplikuar sot gjashtë prokurorë të tjerë. Mes kandidatëve për të qenë pjesë e SPAK është edhe drejtuesja e Prokurorisë pranë Gjykatës se Shkallës së Parë për Krime të Rënda, Donika Prela.
Pak javë më parë, Komisioni i Pavarur i Kualifikimit i dha dritën jeshile Donika Prelës për të vazhduar në sistemin e drejtësisë, duke kaluar me sukses tre shtyllat ku mbështetet Vettingu.
Deri më tani kanë aplikuar 22 prokurorë për të qenë pjesë e SPAK. Afati i aplikimeve për të qenë pjesë e kësaj strukture të drejtësisë së reformuar mbyllet ditën e nesërme.
Prokurorët e tjerë që kanë aplikuar sot për të qenë pjesë e SPAK janë Altin Dumani, Prokuror ne Prokurorinë e Apelit Tiranë, Enkeleda Osmani ( Xhengo), Prokurore në Prokurorinë e Gjykatës së Shkallës së Parë, Durrës, Elida Kackini (Celami), Prokurore Pranë gjykatës së Shkallës së Parë, Tiranë, Enkeleda Millonai, Prokurore në Prokurorinë pranë Gjykatës së Shkallës së Parë Elbasan dhe Maksim Sota, Prokuror ne Prokurorinë Prane Gjykatës së Shkallës Parë Vlorë.
