Pas ngjarjes tragjike që tronditi Vlorën, 15 persona janë shoqëruar në rajonin e policisë. Mësohet se pas marrjes në pyetje në cilësinë e personave që mund të kenë dijeni për ngjarjen dhe konfliktet të mundshme të mëparshme, të shoqëruarit janë lënë të lirë.
Nga breshëria e plumbave humbën jetën Arjan Hasani dhe Aurest Rexho. Ndërkaq, shënjeshtra e atentatit, Armando Sulejmani arriti të shpëtojë, dhe ndodhet në spitalin e Vlorës.
Në vendngjarje policia gjeti më shumë se 25 gëzhoja, ndërsa në makinën e djegur u gjetën tre armë automatike.
Vetë shënjestra, Armando Sulejamani, i njohur si “Çipuri”, bashkë me kunatin, Aurest Rexho, 37 vjeç dhe me shokun e tij Arjan Hasani, 45 vjeç, ishte në një automjet tip Passat në lagjen “Uji i Ftohtë” në Vlorë, kur i është bërë atentat nga persona ende të paidentifikuar.
Viktimë mbeti në vend shoferi, Arjan Hasani. Aurest Rexho ka mundur të dalë nga makina, dhe u gjet nga policia i vdekur në rrugë, rreth dy metra larg automjetit. Ai ishte ulur në vendin e parë të pasagjerit.
Shënjestra e këtij atentati, Armando Sulejmani ishte pasagjer në sediljen pas shoferit. Ai mbeti i plagosur me dy plumba nga të shtënat me breshëri kallashnikovi të autorëve. Këta të fundit u larguan me automjet, i cili u gjet i djegur nga policia në fshatin Babicë të Vlorës.
