Nga: Anxhela Ferra
Ashtu siç u lajmërua një ditë më parë studentët e Fakultetit të Shkencave Sociale i janë bashkuar sot grevës së pedagogëve. Kjo pasi pedagogët e këtij universiteti kanë bojkotuar mësimin. Sipas tyre ky vendim ka ardhur pasi nuk kanë marr asnjë përgjigje nga Ministria e Arsimit për kërkesat e tyre. Pedagogët dhe studentët i bëjnë thirrje të gjithë fakultetet e tjera t’i bashkohen nismës së tyre.
“Nëpërmjet këtij vendimi që kemi marr, ne kërkojmë një shtrim më të gjerë të problemit me ligjin e arsimit të lartë. Gjë që na është mohuar. Nga ana e qeverisë sa i takon VKM-vë të famshme, shtrohet në po të njëjtën logjikë. Një lloj mohimi të problemit, as nuk i janë përgjigjur kërkesave, as nuk kanë pasur ndonjë reagim e aq më pak të jenë shtruar çështjet për diskutim.
Sa i takon grevës së urisë, nuk besoj se problemi shtrohet në një mënyrë të tillë. Është shumë masë ekstreme, banale do të thoja.”
“Tani të gjithë studentët e Fakultetit të Shkencave Sociale janë të informuar mbi pasojat negative dhe katastrofike që ka sjellë ligji i arsimit të lartë. Shumë madje që janë bashkuar me ne edhe kanë sakrifikuar si nga ana ekonomike, ashtu edhe psikologjike. Ndaj duam që ky emancipim të kalojë dhe te fakultetet e tjera, sepse ne nuk mund ta bëjmë universitetin vetëm.”
Por, teksa pedagogët janë të vendosur të vazhdojnë me vijimin e bojkotit; studentët thonë për Tirana Today se pedagogët e jashtëm insistojnë, madje edhe duke i bërë “presion” për vijimin e mësimit.
“Protestën do ta vazhdojmë brenda ambienteve të fakultetit, aty vërtetë e duam ndryshimin. Dekani i përket strukturave më të larta, çka do të thotë që është pjesë e qeverisë dhe normalisht që është kundër bojkotit. Nga profesorët që janë të brendshëm në fakultet nuk po zhvillohet mësim. Por, ka pasur tentativa nga profesorë të jashtëm që sigurisht e dimë se kujt i përkasin. Ata kanë dashur të zhvillohet mësim, pavarësisht se të drejtën legjitime të fakultetit e kanë vetëm profesorët e brendshëm.”
“Ata persona që kërkojnë të bëhet mësim, mund ta gjykoni që janë njerëz të cilët po vijnë për disa plane komplet personale të tyret që po nxisin studentët për të bërë mësim, më saktë po i bëjnë presion. Ndërkohë që vetë institucioni ka marr vendim në mënyrë demokratike që të ketë bojkot.”
“Problemi jonë është një arsim cilësor dhe derisa e kemi zgjatur kaq shumë, të hyjmë në mësim pa marr asgjë do të ishte diçka e kotë. Një ditë në bojkot është shumë aktive, me ligjërime, filma, dokumentarë që kanë pasur të bëjnë me kauzën studentore. Dhe kjo gjë do të vazhdojë të vendosur së bashku me pedagogët, deri në realizimin e kërkesave që kemi parashtruar që në dhjetor.”/ TIRANA TODAY
