Presidenti Ilir Meta dekretoi ditën e djeshme shkarkimin e Ditmir Bushatit dhe dekretimin e kryeministrit Edi Rama në postin e ministrit për Evropën dhe Punët e Jashtme.
Ishte vetë kryeministri i cili propozoi kandidaturën e vetë. Kjo pas refuzimit që bëri kreu i Shtetit ndaj propozimit të Gent Cakaj, për postin e kryediplomatit të Shqipërisë. Për të cilën qytetarët thonë për Tirana Today se ishte shumë e drejtë.
“Nuk kishte pse Presidenti Meta të dekretonte Cakajn. Po të ishte një intelektual dhe i aftë, ai do të ishte në Kosovë, jo këtu te ne. Nuk paska Shqipëria një ministër të Jashtëm. Pse e hoqi Bushatin, apo se i prishi planet Ramës? Këto janë pazaret e tyre dhe është zor t’i zbërthejmë. Rama nuk është njeri për Shqipërinë, është fatkeqësi e këtij populli.”
“Nuk kishte pse miratohej ai nga Kosova, nuk na hyn në punë. Por, sa do të bëjë për Shqipërinë si ministër i Jashtëm nuk e di. Ai nuk ka bërë asnjë punë, ndoshta për vete dhe për xhepin e vetë me siguri që do të bëjë diçka. Ndaj kërkesa e parë që i bëjmë është të ikë Rama nga qeveria.”
Sipas Ramës, kjo do të jetë një zgjidhje e përkohshme, deri në momentin që do të ngrihet Gjykata e re Kushtetuese. E cila do të zgjidhë ngërçin midis Kryeministrisë dhe Presidencës.
Tirana Today pyeti disa nga qytetarët se çfarë mendimi kanë ata për këtë vendim dhe çfarë do t’i kërkonin Ramës në postin e ri ministror.
“Nuk duhet që Rama të jetë dhe kryeministër, por edhe ministër. Nuk shkon të mbajë dy poste qeverisëse.”
“Unë jam i pakënaqur me këto veprime. Ne problemet i kemi me fqinjët, jo me vendet e tjera. Me Serbinë dhe sidomos me Greqinë. Tani kur ajo nuk të njeh kufijtë tokësorë, ne hyjmë në marrëveshje për detin. Ajo marrëveshje nuk duhet të fillojë asnjëherë, pa u rregulluar kufiri tokësor.”
“Kryeministri të shohë pak çështjen e Greqisë dhe marrëveshjen e detit. Ai duhet ta ndalojë sa më shpejt, sepse mua Bushati më duket sikur është nxituar disi.”
“Rama duhet të mundohet të shkrijë sa më shumë marrëdhëniet me Greqinë dhe Serbinë. Nuk duhet të jemi asnjëherë për ngrirje marrëdhëniesh, por duhet të tregojmë tolerancë.”
Një qytetarë thotë se dekretimi Ramës si ministër ishte i tepërt, duke përdorur edhe ironi teksa shprehet se veç të marr tituj fetarë i ka mbetur. Sipas tij në Partinë Socialiste ka emra më të mirë të cilët do të ishin të duhurit për ministër të Jashtëm.
“Jo veç ministër i Jashtëm, Edi Ramës i ka ngelur për tu bërë edhe hoxhë, edhe prift, dervish. Nuk është ndonjë gjë e keqe për ne, t’i ketë të gjitha si person. Jo vetëm kryeministër, ministër, gjykatës, kryeprokuror; këto janë pak. Nëse do të ndërrohet Edi Rama mund të bëhet diçka, por për sa kohë ai ndërron postet nuk ka shpresë. Partia Socialiste ka emra jo për ministër të Jashtëm, por edhe për kryeministër edhe më të mirë se Edi Rama. Për mendimin tim ministra shumë të mirë do të ishin ose Bashkim Fino, ose Pandeli Majko. Janë persona me kredibilitet të lartë.”/ TIRANA TODAY
