Studentët e kanë zhvendosur protestën e tyre në ambientet e universiteteve. Prej disa ditësh ata kanë vendosur të ngujohen nëpër fakultete. Janë studentë nga Universiteti i Ekonomikut, Drejtësisë, Politeknikut, Arkitekturës. Ata shprehen për Tirana Today se do të vazhdojnë deri në fund, edhe nëse kjo do të thotë të humbasin vitin akademik.
“Unë jam e gatshme të shkoj deri në fund, deri në plotësimin e pikave tona. Nuk ka protestë pa pasoja dhe në rastin më të keq që të digjet viti akademik, përsëri ne do të sakrifikojmë. Pasi është një kauzë shumë e rëndësishme për arsimin. Mirëpo, deri sa ne kemi mbështetjen e pedagogëve, do ta zgjidhim me ata. Pasi është një gjë që zgjidhet.”
Ditën e sotme, kryeministri Rama nëpërmjet një postimi në Twitter, tha se studentët që po bojkotojnë mësimin, janë duke i “penguar brutalisht shumicës” mundësinë për të vazhduar mësimi normal. Por, sipas studentëve ata të cilët po protestojnë janë shumica. Dhe sipas tyre, studentët të cilët kërkojnë të rikthehen në mësim, kryesisht e bëjnë sepse kanë frikë. Kjo pasi siç ata thonë për Tirana Today, kanë marr kërcënime nga qeveria.
“Dhe ata studentë të cilët janë të pakët në numër, fryma e tyre na mbështet neve. Ata janë thjesht të keqinformuar dhe kanë frikë nga të gjitha presionet që po i bëhen. Nga z.kryeministër, nga shteti, nga policia. Kjo pasi ndër të tjera i kërcënojnë studentët që do t’i heqin nga puna prindërit. Dhe kështu me të drejtë disa studentë mendojnë që ardhja në mësim është zgjedhja më e mirë. Por, nuk është kështu. Ne duhet të vazhdojmë deri në fund me kauzën tonë.”
“Ka pasur studentë të cilët kanë dashur të hyjnë në mësim. Por, shumica e tyre pasi kanë dëgjuar argumentet janë bindur. Dhe më shumë se 95% e tyre janë bindur dhe janë aty në protestë. Kurse atyre pak studentëve që kanë kërkuar të bëjnë mësim, pedagogët i kanë thënë që shumica është në protestë dhe se ata nuk kanë të drejtë morale që të bëjnë mësim.”
Studentët vazhdojnë të jenë të vendosur për të mos hequr dorë nga kërkesat e tyre. Madje sipas tyre ky është momenti më kritik, i cili do të vendosë të ardhmen e arsimit në Shqipëri.
“Bojkoti do të vazhdojë deri në plotësimin ose daljen e një pakti të ligjshëm nga qeveria. Sepse ajo VKM-ja mund të hidhet poshtë shumë lehtë. Asnjë pikë e kërkesave tona nuk është zgjidhur siç duhet. Përkundrazi, kryeministri është tallur me ne.”
“Do të vazhdojmë me bojkotin total të mësimit. Kryeministri ka lëshuar pe, por jo aq sa duhet. Dhe është duke matur durimin e studentëve. Por, protesta do të vazhdojë deri në atë pikë që kryeministri të lëshojë pe aq sa duhet. Presioni ndaj qeverisë me këtë lloj proteste është i jashtëzakonshëm. Dhe nëse ai nuk lëshon pe, peri do të këputet.” TIRANA TODAY
