Mëngjesin e ditës së sotme ka pasur tensione në kufirin Greqi-Shqipëri, në pikën kufitare të Kakavijës. Kjo pasi policia shqiptare ka përdorur kontrolle të rrepta ndaj qytetarëve grekë që ishin nisur për të vizituar familjen në ceremoninë përkujtimore të Kostandin Kacifas në Bularat.
Kacifas u vra nga Forcat RENEA më 28 tetor, pas një shkëmbimi zjarri me policinë. Disa nga grekët që po përpiqeshin të kalonin në Shqipëri nuk janë lejuar nga policia kufitare, pasi konsideroheshin si persona që mund të shkaktonin trazira.
Për këtë arsye grekët që nuk u lejuan të kalonin kanë nisur një protestë në doganë dhe kanë bllokuar rrugën e autobusëve që vinin nga Shqipëria në drejtim të Greqisë.
Por policia greke ka ndërhyrë për të liruar rrugën dhe është detyruar që të largojë me forcë protestuesit. Qytetarët grekë reaguan duke kënduar himnin kombëtar.
Ndërkohë, shërbimi përkujtimor në varrezat e Bularatit nuk pati incidente dhe ishte nën mbikëqyrje nga forca të shumta policie. TIRANA TODAY
