Ministri i Arsimit të Greqisë, Kostas Gavroglou akuzoi partinë e “Agimi i Artë” se po bën gjithçka për të injektuar ‘helmin e nacionalizmit’ te nxënësit e shkollave të mesme.
Partia me ideologji nacionaliste, “Agimi i Artë”, mbështet fuqishëm protestat e shkollave të mesme në Greqi. Shumë protestues përdorin sloganet famëkeqe të “Agimi i Artë”. Por, askush nga kjo parti, nuk është i përfshirë në mënyrë të hapur në organizimin e trazirave, të cilat përhapen përmes platformave të mediave sociale.
Zyrtarët thonë se adoleshentët mbyllën 210 nga 604 shkolla të mesme në Selanik dhe zonat fqinje.
Protestat e nxënësve ishin për të kundërshtuar marrëveshjen e propozuar, për të normalizuar marrëdhëniet mes Greqisë dhe Maqedonisë.
Marrëveshja parashikon ndryshimin e emrit të Maqedonisë me emrin e ri “Maqedonia e Veriut”. Më pas Greqia do të heq dorë nga bllokimi që i kishte bërë deri tani Maqedonisë për t’u bashkuar me NATO-n dhe Bashkimin Europian.
Deri dje Athina zyrtare pretendonte se emri aktual nënkupton pretendime në territorin grek, por emri i ri “Maqedonia e Veriut” e dakordësuar mes dy palëve ka bindur dy qeveritë se nuk do ketë më probleme.
Por marrëveshja e propozuar ka ndarë Greqinë, dakordësia Tsipras-Zaev u prit me kritika të forta në veri dhe ka zemëruar Kishën Ortodokse greke. TIRANA TODAY
