Ish-kryeministri Berisha ka komentuar propozimin e Ridvan Bodes, si anëtar të Keshillit Mbikëqyrës të Bankës së Shqipërisë nga kryeministri Rama. Vendimin e një prej bashkëpunëtorëve të tij të ngushtë ndër vite, ai e ka cilësuar si individual. Sipas tij, është zgjedhja e tij personale largimi nga politika tek bordi i Bankës.
“Ka bërë zgjidhjen e tij; është larguar nga politika. Kështu e konceptoj unë vendimin e tij për të kaluar te bordi i Bankës, i cili është një institucion i pavarur”, tha ai në emisionin e gazetarit Lutfi Dervishi, në TVSH.
Pyetur nëse Bode do të votohet nga Partia Demokratike, Berisha u shpreh se selia blu e ka bojkotuar procesin. “Nuk ka marrë pjesë, dhe nuk është konsultuar fare. Këtu ka një problem nga ana morale, pasi këto janë kandidatura të qeverisë”, sqaroi Berisha.
Referuar kandidaturës së Florion Mimës, edhe ky një ish zyrtar i lartë i PD-së, Berisha e cilësoi si mendje brilante.
Pjesë nga intervista:
Dervishi: Janë një pjesë ish-zyrtarësh të lartë të PD, potenciale të saj që shkojnë në zyra private si Banka e Shqipërisë dhe institucione të tjerë, si Florjon Mima, Ridvan Bode, Majlinda Bregu…
Berisha: Florjon Mima është një mendje brilante në Shqipëri, dhe është e vështirë të gjesh një tjetër si ai. Ridvan Bode ka bërë zgjedhjen e tij, është larguar nga politika. Kështu e shikoj unë vendimin e tij.
Dervishi: Do ta votojë PD?
Berisha: Nuk ka marrë pjesë dhe nuk është konsultuar fare. Këtu ka një problem nga ana morale, pasi këto janë kandidatura të qeverisë.
Dervishi: Këtu është paradoksi, që nuk i merr PD, por i shfrytëzon qeveria…
Berisha: Nuk mund të themi se për inat të sime vjehrre, do shkojë të fle më mullixhiun. Nuk mund të themi këtë, pasi ia ka marrë një vendim, është larguar nga politika. Rama tha se me një SMS ka rënë dakord, në rregull nuk mund të them gjë.
