Policia italiane ka vënë në pranga një 40-vjeçar shqiptar, pasi me mjetin e tij po transportonte drogë. Po kështu, atij iu sekuestruan sërish lëndë narkotike edhe në banesën e tij. Shqiptari, identiteti i të cilit nuk bëhet me dije për shkaqe hetimi, është pikasur nga lëvizjet e dyshimta.
Rreth orës 22:00, në periferi të Stezzanos, shërbimet Antidrogë të policisë identifikuan dhe ndalën një automjet tip “Fiat 500”.
Gjatë kontrollit të mjetit, policia gjeti 40 gramë kokainë, e ndarë në 29 doza dhe e gatshme për t’u shitur. Ndërkohë, në mjet u gjetën edhe 8.000 euro, para të përfituara nga shitja e drogës.
Shqiptarit iu bë një kontroll edhe në banesë, ku u gjet një sasi prej 150 gramë kokainë e paketuar në 18 pako. Lënda narkotike ishte fshehur brenda një vazoje qeramike, në dhomën e ndenjes.
Ndërkohë, në një sirtar në kuzhinë, policia gjeti dy peshore elektronike dhe materiale të ndryshme për paketimin e narkotikëve.
