Diktatori libian sundoi me dorë të hekurt vendin e tij për 42 vjet. Lindi në një familje barinjsh, dhe gjatë gjithë jetës u vesh si i tillë. Regjimi i tij, u karakterizua nga një kontroll i rreptë policor, me shërbimin sekret që kontrollonte edhe gjërat më të vogla në jetën e përditshme të libianëve. Financoi shumë grupime terroriste, dhe u përball me disa atentate. Sundimi mizor i Gadafit, kishte edhe shumë aspekte populiste.
Energjia elektrike, arsimimi dhe kujdesi shëndetësor ishin falas për të gjithë qytetarët, ndërsa kreditë jepeshin me 0 për qind interes. Por këto nuk mund të kompensonin mungesën e skajshme të lirive dhe të drejtave të njeriut.
Gadafi ishte edhe një pervers i madh seksual. Ai kishte fiksim adoleshentet e virgjëra, të cilat rrëmbeheshin nga familjet e tyre në zona të ndryshme të vendit, dhe i dërgoheshin si dhuratë kolonelit. Kur udhëtonte jashtë shtetit, Gadafi shoqërohej nga një eskortë prej 300 vetash, mes tyre 40 truproja femra, për të cilat këmbëngulte se duhet të ishin të virgjëra.
Për shkak të shitjes së naftës, kishte një pasuri prej dhjetëra miliarda dollarësh. Por nuk e pëlqente shumë luksin. Merrte kudo me vete çadrën e tij beduine. Në vitin 2007 e hapi atë në ambientet e një hoteli me 5 yje në Paris, ku lejoi edhe devenë e tij që të sillej vërdallë. Pas një kryengritje disa mujore në vitin 2011, kapet dhe ekzekutohet pa gjyq nga rebelët.
