Teksa sot Kuvendi diskuton projektligjin e buxhetit 2019, opozita sërish ka zgjedhur me mos pjesëmarrje. Kryeministri Rama e nisi fjalën e tij me protestën e Astirit, të cilët ndodhen jashtë ambienteve të Kuvendit.
Ai e cilësoi si protestën më të turpshme që këtij vendi i ka zënë syri ndonjëherë. “Opozita mungon jo vetëm fizikisht, por mungon dhe figurativisht. Asnjë mbledhje publike, në asnjë hotel për buxhetin sa për të larë gojën të paktën, asnjë amendament i dërguar në Kuvend sa për të larë duart të paktën.
Asnjë lloj shenje jete tjetër lidhur me debatin më të rëndësishëm parlamentar të vitit. Nëse nuk i llogarisim ato kapjet e veshit mbrapsht të zonjës Tabaku një herë në muaj, e cila e di dhe vetë se nuk di çfarë flet kur lexon tekstet kadrioteske të partisë. Kontributi ka qenë meritë e Kadri Vasilit.
S’kemi ç’bëjmë, jemi të dënuar ta udhëheqim vendin pa opozitë, as dhe kur diskutohet buxheti në Kuvend. Ndërkohë që opozita udhëheq protestën më të turpshme të vendit, në mbrojtje të ndërtimeve të paligjshme kundër interesit publik”, deklaroi kryeministri.
Rama u ndal edhe tek buxheti. “Buxheti i ri 400 dollarë për beben e parë, 800 për beben e dytë, 1200 për të tretin dhe më tej. 1600 per binjakët dhe 2400 dollarë për trinjakët. Në total, miliona e miliona dollarë, që për herë të parë vihen në dispozicion të familjes që në ditën e parë të lindjes. Një politikë e re sociale”, tha Rama.
