Gjatë mbledhjes së Komisionit të Ekonomisë, ministri Damian Gjiknuri tha se autostrada Tiranë-Elbasan do të jetë e kalueshme vetëm në fund të muajt janar. Ai u shpreh se rruga mund të hapet deri në fund të muajt janar të vitit të ardhshëm, ndërkohë që përfundimi i gjithë projektit mund të shtyhet për disa muaj.
“Mund të ketë një shtesë disa mujore, por asgjë nuk mund ta ndalojë projektin. Deri në fundin e janarit, do të jetë e kalueshme në njërin krah”, deklaroi ministri Gjiknuri.
Por ky afat i Gjiknurit është i ndryshëm nga ai i kryeministrit Edi Rama. Më herët, Rama ka deklaruar se autostrada e Elbasanit do ishte e kalueshme të paktën në muajin dhjetor, ndërkohë që ministri i tij, nuk është i sigurtë nëse kjo do të realizohet edhe në muajin janar.
Rama: Rruga Elbasan-Tiranë finalizohet brenda 2018
Deklarata në 13 mars
Për rrugën Elbasan-Tiranë, Rama tha se do të finalizohet brenda këtij viti. “Ne do të marrim përsipër financimin. Rruga është gropa e një marrëzie të shkuar dhe babëzie të freskët. Për marrëzinë e shkuar, kanë paguar qytetarët dhe buxheti i shtetit. Shpresoj që për babëzinë e freskët, të paguajnë ata që janë në hetim. Ne kemi detyrë dhe do të bëjmë deri në fund të vitit.
Nga Elbasani, Rama tha se ky qark do të jetë një prej qarqeve që ka përfitueshmëri më të lartë nga programi i fshatrave turistikë. “Projekte skandaloze, kontrata skandaloze, menaxhim skandaloz dhe rritje kostosh skandaloze. Sidoqoftë ajo ç’ka ne jemi angazhuar dhe jemi të vendosur të realizojmë, është që rruga më në fund të finalizohet brenda këtij viti. Pra të hapet përfundimisht dhe të lidhet Elbasani me Tiranën. Ndërkohë që të ecet me segmentin Qukës-Qafë Pllocë”, shtoi më tej kreu i qeverisë.
