Ministri i Infrastrukturës dhe Energjisë, Damian Gjiknuri, i pranishëm në Komisionin e Ekonomisë, ka folur për projektin e Unazës së Madhe, e cila përfshin shembjen e shumë objekteve në zonën e Astirit. Për të bërë vlerësimin real të objekteve, shteti do të vlerësojë të gjitha dokumentet që banorët disponojnë, dhe se shumë shpejt do të publikohet një listë shpronësimesh nga institucioni që ai drejton. Ai tha se tendenca për të penguar punimet, është një proces i pisët politik. Po kështu, Gjiknuri qetësoi banorët se për çdo objekt, do të ketë vlerësim sipas ligjit.
“Nxjerrin njerëz në rrugë, pa patur një projekt konkret. Tendenca për të penguar punimet është një proces i pisët politik. Të bashkëpunojnë me ARRSH dhe Bashkinë. Çdo objekt do të ketë një vlerësimin sipas ligjit, do të ketë një dëmshpërblim real financiar.
Nuk mund të bëjë shteti qoftë një transaksion pa vlera reale. Procesi nuk ka filluar, banorët një pjesë e tyre që kanë dokumentacion kanë shkuar pranë institucioneve.
Të gjithë banorët që kanë pretendime, apo dokumente, të shkojnë te zyrat e hapura të ARRSH. Pyetja që bëjnë dhe m’u dha rasti që ta jap këtë sqarim, pa dalë lista e ministrisë e shpronësimeve, nuk do të ketë akoma një dëmshpërblim real”, u shpreh Gjiknuri.
