Protesta e banorëve të Astirit ka marrë vëmendjen edhe të Bashës, ku nga Berati ka ironizuar kryeministrin Rama. Ai tha para të pranishmëve se Rama nuk qan hallin e banorëve, por merret me ekspozita luksi në Gjermani, dhe me mbylljen e dosjeve të krimit. Në vazhdën e akuzave, Basha iu rikthye edhe një herë emrave, që për opozitën, janë të lidhur me bandat e krimit.
“Shumica e banorëve, kanë përfunduar legalizimet. Në cilin vend botës kërcënohet qytetari pa garantuar dëmshpërblim me vlerën e tregut, që të transferohen me qira, apo me paratë e marra që të marrë pronë tjetër.
Kjo nuk ndodh askund tjetër, vetëm në një vend, gjeneza e të keqes është pakti i politikës me krimin. Një kryeministër që vjen me bandat kriminale, nuk i shkon mendja te vogëlushët e “Unazës së Re”, te fermerët, pensionistët, sipërmarrja.
E gjithë koha e Ramës shkon që të merret me ekspozita luksi në Gjermani, merret me mbylljen e dosjeve të krimit të Xhafës, Taulant Ballës, Vangjush Dakos. Të gjithë të lidhur me krimin, të pasuruar në mënyrë marramendëse, e vetë Rama është politikani më i pasuri në Ballkan.
Dy janë kolonat që e mbajnë në pushtet. E para aleanca me krimin. E dyta servilizmi i atyre që bëjnë propagandën e këtij regjimi, që kanë guximin ta mbrojnë në studio televizive. Nuk guxojnë të shfaqin të vërtetën siç është, por i bëjnë lajka.
Na flasin për rritje ekonomike në një vend që në 4 vjet janë larguar 500 mijë shqiptarë. Si mund të ketë rritje, ku 1 në 6 qytetarë është larguar?!”, tha Basha, gjatë prezantimit të platformës për çlirimin e politikës, zgjedhjeve dhe ekonomisë nga krimi.
