Ish-ministri i Jashtëm i Greqisë, Nikos Kotzias ka tronditur me deklaratën e tij të fundit në një intervistë për news247.gr, ku u shpreh se ushtria greke refuzon që të njohë kufijtë shtetërorë midis Shqipërisë e Greqisë. Por një shqetësim tjetër sipas tij është edhe ndikimi i madh që kanë forcat ekstremiste në shtetin grek.
Kotzias ka folur hapur duke treguar se ka ende shumë faktorë politikë në Greqi që kanë rivendikime territorialë ndaj Shqipërisë, duke refuzuar të njohin traktatet ndërkombëtare. “Ushtria jonë refuzon që të njohë kufijtë midis Greqisë e Shqipërisë. Ushtria duhet që të bëjë disa veprime me anë të të cilave të shprehet njohja e kufijve prej saj dhe nuk po i bën”, ka deklaruar Kotzias gjatë një interviste të dhënë sot për një radio greke.
“Ka shumë forca në vendin tonë që nuk duan që ne të sanksionojmë juridikisht dhe të themi që ka përfunduar Lufta e Dytë Botërore me Shqipërinë dhe të njohim zyrtarisht kufijtë me Shqipërinë. Po hapin tema të vjetra si Vorio-Epiri. Nuk njohin Traktatet e Firences dhe Parisit, si dhe marrëveshjen e Helsinkit. Disa deklarata të tilla synojnë drejt Traktatit të Korfuzit që parashikonte autonominë e Vorio Epirit.”
Ish-ministri i Jashtëm i Greqisë e ka lëshuar një deklaratë të tillë pasi është pyetur nga gazetarët rreth situatës të acaruar kohët e fundit midis Greqisë e Shqipërisë pas vrasjes së minoritarit Konstandison Kaçifas nga policia shqiptare. Kotzias pasi ka shprehur keqardhjen për vdekjen e minoritarit ka theksuar se një rast episodik nuk duhet të ndikojë në marrëdhëniet midis dy shteteve, pasi sipas tij Greqia e ka problemin kryesor nga lindja, duke lënë të nënkuptohet për Turqinë.
“Çdo jetë e humbur është një humbje e madhe. Çdo jetë që mund të ishte mbrojtur me një mënyrë tjetër është një fitore e madhe. Nuk duhet që në emër të ngjarjeve negative të drejtohemi në ashpërsimin e marrëdhënieve dypalëshe me fqinjët. Kjo sepse problem ynë nuk janë as Shqipëria, as FYROM dhe as Bullgaria, problemi ynë është nga lindja, të mos shpërqendrohemi”, u shpreh Kotzias.
