Pas dënimit të Shullazit me 14 vite burg, vjen edhe reagimi i Ambasadës Gjermane në Tiranë. Ambasadorja Schutz përshëndeti vendimin për të cilin tha se dëshmon që askush nuk qëndron mbi ligjin.
“Përmirësimi i bilancit të sukseseve në luftën kundër krimit të organizuar dhe korrupsionit është një nga detyrat qendrore të Shqipërisë në rrugën e saj drejt Bashkimit Evropian”, shkruhet ndër të tjera në reagimin e Schutz.
Kujtojmë se më herët pati një reagim edhe nga Ambasada Amerikane në Tiranë, e cila e vlerësoi si një hap pozitiv dënimin e Shullazit, ndërsa paralajmëroi vendime të tjera të rëndësishme në luftën kundër krimit.
Reagimi i plotë:
E kam ndjekur me shumë vëmendje procesin ndaj pesë të pandehurve në çështjen Emiljano Shullazi dhe përshëndes faktin që tanimë është marrë një vendim në shkallë të parë. Vendimet e Gjykatës për Krimet e rënda të bëra të ditura ditën e djeshme tregojnë, që askush nuk qëndron mbi ligjin, sikundër nënvizojnë forcën e shtetit ligjor në Shqipëri.
Është e rëndësishme që drejtësia shqiptare të vazhdojë të veprojë kundër krimit të organizuar mbi bazën e ligjit dhe të drejtës. Përmirësimi i bilancit të sukseseve në luftën kundër krimit të organizuar dhe korrupsionit është një nga detyrat qendrore të Shqipërisë në rrugën e saj drejt Bashkimit Evropian.
