Në mediat greke është publikuar një këngë e cila i kushtohet Kostandinos Kacifas. Kënga këndohet nga Efi Barbaki dhe në qendër të saj vihet si personazh një hero që ra për të çliruar Vorio-Epirin.
Kostandinos Kacifas u vra pak ditë më parë në Bularat të Gjiroastrës nga forcat RENEA. Gjithçka ndodhi pasi viktima sulmoi me armë policinë shqiptare, pas një feste që u organizua nga minoriteti grek. Ngjarja së fundmi ka marrë një rrjedhë tjetër, ku dyshohet se ai mund të jetë vetëflijuar, por akoma nuk ka një sqarim përfundimtar nga organet kompetente.
Ngjarja mori një vëmendje të madhe, madje vazhduan edhe reagime politike nga drejtuesit e të dy shteteve. Neonazistët e Agimit të Artë organizuan protesta para ambasadës shqiptare në Athinë, madje shkuan deri në atë pikë që të digjnin flamurin shqiptar e të thërrisnin kore raciste.
Ajo pjesë e grekëve që e cilësuan si ‘hero’ Kostandinos Kacifasin nuk kanë reshtur duke bërë thirrje kundër Shqipërisë, madje deri në kërkesa për të shfarosur shqiptarët. Ndërsa tani kanë shkuar edhe më tej duke i kushtuar një këngë Kacifasit duke e cilësuar si hero për veprimin ekstremist që bëri në tokën shqiptare.
Videoja e këngës është shpërndarë shumë nga grekët, e cila po arrin në dy mijë, ndërsa shikueshmëria është rreth 90 mijë persona. Ndërsa edhe komentet kanë qenë të shumta, ku shumica e tyre e mbështesin dhe e përgëzojnë për këngën që ka bërë. Ata e cilësojnë si një veprim të madh të Kacifas dhe e quajnë hero, ndërsa shprehen se ndjehen krenar pasi dëgjojnë këto vargje.
Nuk dihet nëse bërja e një kënge pas një ngjarje të bujshme është një traditë greke. Gjithsesi ajo ka qenë një traditë e vjetër ballkanase, por populli më i vjetër që e kanë ruajtur kanë qenë shqiptarët. TIRANA TODAY
