Në ditët e sotme, aktiviteti fizik dhe sportiv është kthyer në pjesë të pandashme për shumë djem dhe vajza. Orë të gjata nëpër palestra, duke bërë vrap ose ushtrime të ndryshme. Por, të rinjtë e sotëm po “sfidohen” nga mosha e tretë. Për ta vitet që ikin nuk janë asnjëherë kambanë alarmi. Madje edhe pse janë në moshë të thyer, ata vazhdojnë jetën me të njëjtin intensitet si në rini.
Ambientet e Liqenit Artificial janë të preferuarat e tyre, më shumë se natyrën, ata e vizitojnë për veglat ku bëjnë stërvitje.
“Unë vij përditë këtej nga Liqeni, posaçërisht për veglat. Kur unë isha i ri bëja stërvitje intensive, isha sportist i kategorisë së parë. Por, ikën ato kohë. Ka që shkojnë dhe në palestra, por ne vijmë më shumë këtej nga Liqeni, sepse sikur është më mirë pa lekë sesa me lekë.”
“Shumë herë unë shoh mosha më të avancuara se unë që vijnë e bëjnë stërvitje. Kryesisht vijnë nga këshillat që japin dhe doktorët, të cilët thonë se të bën mirë gjimnastika. Nuk ka më mirë se këtu në natyrë, pasi bën shëtitje, po ashtu edhe veglat.”
Domosdoshmëria e aktivitetit fizik
“Prej 10 vitesh unë merrem me aktivitet fizik dhe vij çdo ditë. Qëndroj për afro 1 orë, bëj veglat dhe gjimnastikë. Kur erdha në fillim unë nuk lëvizja dot, kisha probleme edhe me frymëmarrjen. Pasi nisa stërvitjen, lashë edhe duhani. Mundohem të kujdesem për trupin tim. Më e lehtë është ta ruash veten sesa ta shërosh. E sheh sesi rrinë aty gjithë ditën dhe luajnë domino. Të paktën një orë në ditë njeriu duhet të bëjë stërvitje, e të dalë dhe me nipat e mbesat pasdite. Pra, të ketë aktivitet fizik. Jo vetëm domino, se po ndenje vetëm ulur dhe u bëre monoton, atëherë do sëmuresh.”
Ndërkohë të tjerë të moshuar thonë për Tirana Today se stërvitja e tyre lidhet veç me një ecje dhe se preferojnë që kohën ta kalojnë duke u qetësuar.
“Më së shumti e kaloj ditën duke luajtur domino, e duke bërë nga një xhiro të shkurtër. Kaq, nuk kemi takat për më shumë.”
“Unë kam 52 vite që bëj stërvitje me biçikletën time. Por, aktiviteti fizik është shumë i nevojshëm për njerëzit. Pavarësisht se ndonjë orë ne e kalojmë duke luajtur edhe domino.”
“Unë vij nga Rruga e Durrësit e deri këtu te Liqeni dy herë në ditë. Më pas ulem këtu për afro dy orë. Kur shoh ata të moshës sime që bëjnë stërvitje i them bravo i qoftë, por unë më mirë qetësohem këtu dhe shplodhem duke bërë ndonjë lojë.” TIRANA TODAY
