Ministrja e Drejtësisë, Etilda Gjonaj ka bërë publike masat e reja ndëshkimore që janë marrë kundër korrupsionit. Pas denoncimeve dhe kontrolleve të kryera në institucione në qarkun e Tiranës, janë dhënë 36 masa disiplinore, me 15 largime nga puna.
Furtunë në Inspektoratin Shtetëror të Mjedisit, Pyjeve, Ujërave dhe Turizmit në Tiranë. Shkarkohen nga puna 15 zyrtarë. Mes tyre kryeinspektori, 8 inspektorë pyjorë dhe për 6 inspektorë mjedisorë, për akte korruptive apo abuzime me detyrën.
Gjonaj theksoi se pas denoncimeve apo informacioneve që qytetarët kanë dhënë në platformën e bashkëqeverisjes ‘shqiperiaqeduam.al’, janë kryer kontrolle dhe inspektime në Spitalin Universitar Obstetrik Gjinekologjik “Koço Gliozheni” në Tiranë.
Si dhe në Inspektoriatin Shtetëror Shëndetësor – Dega Rajonale Tiranë. Ndërsa në total janë rekomanduar 36 masa disiplinore.
“Ministria e Drejtësisë, në bashkëpunim me Task-Forcën Antikorrupsion, ka dërguar në Prokurorinë e Rrethit Gjyqësor Tiranë, një raport lidhur me shkeljet e gjetura në Drejtorinë e Përgjithshme të Burgjeve. Për një procedurë të prokurimit publik. Nga kontrolli kanë rezultuar veprime të dyshimta të Komisionit të Vlerësimit të ofertave. Ç’ka ka bërë që raporti i kontrollit t’i dërgohet Prokurorisë për veprime të mëtejshme”, u shpreh ministrja.
Në raportin e përjavshëm ajo e vuri theksin edhe tek rezultatet e Policisë së Shtetit. Në bashkëpunim me organin e prokurorisë kanë evidentuar 27 vepra penale në fushën e korrupsionit dhe abuzimit me detyrën nga ana e punonjësve të administratës publike. Dhe janë proceduar penalisht 37 autorë.
Shërbimi i Kontrollit të Brendshëm në sistemin e burgjeve ka rekomanduar marrjen e masave administrative. Kjo për 3 drejtues të Institucioneve të Ekzekutimit të Vendimeve Penale, për shkelje të ligjit dhe shpërdorim të detyrës.
“Këto rezultate dhe efekti i drejtpërdrejtë që kanë ato në perceptimin e publikut për nivelin e korrupsionit në vend. Na motivojnë për të vazhduar me të njëjtën këmbëngulje dhe të njëjtën ashpërsi ndaj kujtdo punonjësi të administratës. Apo qytetari që do të kryejë akte korruptive”.
