Ngjarja e ish-Bllokut po merr zhvillime të reja. Dje në mbrëmje është arrestuar pronari i lokalit ku ndodhi masakra. Blutë e Tiranës kanë vënë në pranga rreth 17 ditë pas ngjarjes së rëndë pronarin e lokalit. Redi Popescu është arrestuar dje, për veprime që pengojnë zbardhjen e së vërtetës.
Ai ishte personi i vetëm që u bë dëshmitar i ngjarjes, dhe mund të sillte dëshmi të vlefshme për grupin hetimor, për të zbardhur krimin.
Dëshmia ngatërron policinë
Mesa duket, dëshmia e tij më shumë ka ngatërruar policinë. Redi Popescu dyshohet se ka fshehur armën e Ervis Martinajt menjëherë pas ngjarjes, dhe se ka dhënë dëshmi të rreme.
Në ngjarjen e 4 tetorit mbeti i vrarë Fabian Gaxha, ndërsa u plagosën Ervis Martinaj dhe Elion Hate.
Në kërkim për ngjarjen janë shpallur Ervin Mata, Mevjol Bilo dhe Fabio Allushi.
Në fillim u tha se sherri mes palëve ndodhi për shkak të Elvana Gjatës. Pretendohej se i dashuri i saj, Ervin Mata, mori hak pasi ngacmuan Elvana Gjatën. Por pas shumë hetimesh intesive, policia u referua tek pista e konflikteve të mëparshme për çështje droge.
Deklarata e policisë
Arrestohet një tjetër shtetas në lidhje me ngjarjen e ndodhur në një lokal, në mbrëmjen e 04.10.2018, ku mbeti i vrarë me armë zjarri shtetasi F. G., dhe u plagosën shtetasit E. H., dhe E. M.
Specialistët për Hetimin e Krimeve të Rënda ndaj Jetës dhe Pronës, arrestuan për veprën penale “Veprime që pengojnë zbulimin e të vërtetës”, shtetasin Redi Popescu, 40 vjeç, banues në Tiranë.
Materialet iu referuan Prokurorisë së Rrethit Gjyqësor Tiranë, në ngarkim të shtetasit të lartpërmendur, për veprën penale “Veprime që pengojnë zbulimin e së vërtetës”, parashikuar nga neni 301 i Kodit Penal.
https://tiranatoday.com/ne-bllok-pranga-pronarit-te-lokalit/
