Një 21-vjeçar shantazhonte ish të dashurën e tij duke i thënë se do i publikonte disa foto intime. Por kërcënimet e të riut morën fund shpejt së vajza ka bërë kallëzim në polici.
Policia e Tiranës ka arrestuar 21-vjeçarin nga Mamurrasi pasi dyshohet se i kishte vënë gjobë ish-të dashurës së tij, në mënyrë që të mos ia publikojë në rrjetet sociale, ai i ka kërkuar vajzës 20 mijë lekë të rinj.
Në pranga është vënë shtetasi Ylli Kaçi, i cili disa ditë më parë ishte denoncuar nga vajza me iniciale A.Gj.
Në denoncimin që e dëmtuara ka bërë pranë specialistëve për Hetimin e Krimeve ndaj Jetës dhe Pronës, ka treguar se Kaçi i bën vazhdimisht shantazh me disa foto që ajo i ka dërguar gjatë kohës që kanë qenë të lidhur.
Por, sipas të dëmtuarës, këtë veprim ai e ka bërë në vazhdimësi, pasi ka arritur t’i marrë më parë një shumë të hollash për të njëjtën arsye. Ndërsa së fundmi i kërkonte sërish para. Për këtë arsye, shtetasja A.Gj., duke mos qenë më e sigurt, ka vendosur që ta denoncojë në Polici dhe menjëherë është bërë arrestimi i 21-vjeçarit.
KALLEZIMI
Burime nga Policia e Tiranës thanë se disa ditë më parë është paraqitur për të bërë kallëzim shtetasja me iniciale A.Gj. Ajo pretendonte se ishte shtrënguar me anë të kanosjes për dhënie pasurie, nga një 21-vjeçar nga Mamurrasi, shtetasi Ylli Kaçi.
Në kallëzim, vajza ka sqaruar se me këtë shtetas kishte pasur një histori të shkurtër dashurie dhe nëpërmjet aplikacioneve të ndryshme në celular kanë shkëmbyer me njëri-tjetrin edhe disa fotografi intime. Por disa javë pasi janë ndarë, 21-vjeçari ka nisur ta shantazhojë, duke i thënë se tashmë fotografitë e saj do t’i publikonte në rrjetet sociale.
Por për të mos e bërë këtë veprim, ai i kishte kërkuar një shumë parash, që vajza ia kishte dhënë. Pasi i ka premtuar se tashmë nuk do ta bezdiste më, disa ditë më parë, i riu i ka shkruar sërish të dëmtuarës, duke i kërkuar 20 mijë lekë të rinj, po për të njëjtën arsye.
Në këto rrethana vajza ka vendosur t’i drejtohet për ndihmë Policisë. Pasi janë verifikuar mesazhet që ai ka shkëmbyer me të dëmtuarën, ku kishte edhe kërcënime dhe flitej për para, Policia ka bërë të mundur arrestimin e tij.
