Për deputetin demokrat Ervin Salianji, e gjithë ajo çfarë ndodhi mbrëmjen e djeshme, është një vrasje e mirëfilltë mafioze. Ai kërkon që kjo ngjarje kriminale të mos trajtohet si një histori rozë. Sipas tij, të gjitha këto detaje të bën të kuptosh se kemi të bëjmë me një luftë mes bandave të kokainës, për kontrollin e territorit. Për të, kjo është alarmante dhe se nuk ka në asnjë vend të botës që një konflikt banal të përfundojë që 6 persona të nxjerrin armët.
“Është një nga ngjarjet më të rënda që ka ndodhur në Shqipëri në këto kohët e fundit, dhe e bën të rëndë jo vetëm vrasja dhe plagosja e disa personave, por disa elementë të tjerë. Sot është trajtuar sikur të jetë një histori rozë, sikur këtu kemi të bëjmë me një vajzë dhe një sherri mes 2 apo disa personave për shkak të një ngacmimi, ç’ka nuk është e vërtetë.
Të gjitha rrethanat apo faktet që janë bërë publike në mënyrë zyrtare
Faktet tregojnë disa elementë skandalozë të gjendjes së sigurisë në mes të Tiranës. Në një zonë të frekuentuar, 100 metër nga zyra e kryeministrit kalojnë 6 persona që janë të armatosur. Janë përdorur 6 armë aty, mund të ketë pasur edhe më shumë dhe nuk thotë askush përgjegjësinë e policisë që në ketë territor qarkullojnë persona me armë.
Një prej personave të plagosur qarkullon fare lirshëm, pavarësisht se është i akuzuar dhe i kërkuar nga policia për vrasje. Policia e Shtetit, sot pavarësisht se i kalojnë nën hundën e vetë, nuk ka asnjë person të arrestuar.
Nuk merret askush me turpin e madh, sesi në mënyrë skandaloze dhe jo profesionale policia merr para syve të gjithë kamerave dhe tërheq të vrarin. Të gjitha këto elementë të bëjnë të kuptosh, shtënia me 6 armë, kapja e 10 mijë eurove. Përfshirja e personave me precedentë penal nuk të bën të mendosh se kjo është një histori rozë. Është një trup që përdoren këto si shashka nga policia për të tërhequr vëmendjen, por të bën të mendosh se kjo është një luftë mes bandave të kokainës për kontrollin e territorit. Nuk ka në asnjë vend të botës që një konflikt banal të përfundojë që 6 persona të nxjerrin armët”, tha ai në një intervistë për “Ora News”.
