Një stuhi tropikale mesdhetare ka goditur Kretën së fundmi. Era dhe shira të shumta kanë shoqëruar stuhinë, ndërsa pritet që pjesë të Greqisë Jugore dhe Turqisë të përmbyten.
Stuhia e pagëzuar me emrin “Zurba” është një ciklon i rrallë tropikal që formohet në detin Mesdhe dhe është e ngjashme me sistemet subtropikale në oqeanin Atlantik.
Deri më tani nga ky ciklon janë regjistruar katër të vdekur në Libi e Tuniyi, aty ku pati edhe origjinën.
Athina po përballet me ndërprerje të energjisë elektrike ndërkohë që janë mbyllur shkollat dhe anuluar shumë fluturime.
Nga ana tjetër situata duket se do të rëndohet edhe në vendin fqinj, Turqinë.
Autoritetet në Stamboll kanë njoftuar banorët të përgatiten për përmbytje në disa provinca, ndërkohë që erërat kanë arritur deri në 120 km/h.
Gjithashtu pritet që dallgët në Egje të arrijnë deri në 11 metra lartësi, e të rrezikuara duken qytetet e bregut të Peleponezit dhe Greqisë kontinentale.
Sipas Greek Reporter, në portin e Pireut, anijet do të mbeten të ankoruara ndërsa erërat në juglindje të detit Egje do të intesifikohen. Gjithashtu erërat në detin e Kytherës do të jenë jashtëzakonisht të forta dhe zona është në gatishmëri të lartë.
Agjensia për Mbrojtjen Civile ka lëshuar një listë udhëzimesh për publikun e gjerë se si të mbrohen nga stuhia, duke u bërë thirrje atyre të:
- Sigurojnë objektet që mund të merren nga era dhe të shkaktojnë plagosje të banorëve
- Shmangin rrymat e uji ose lumenjt, qoftë në këmbë apo me makinë gjatë stuhive apo edhe kur stuhitë kanë mbaruar
- Shmangin punët dhe aktivitetet jashtë shtëpive dhe sidomos pranë vijës bregdetare gjatë kohës së stuhisë
Sipas parashikimeve, zonat e vetme në vend që nuk do të preken nga cikloni do të jenë pjesa veriore e detit Jon, Epiri dhe Maqedonia Perëndimore.
