Shkarkohet nga detyra gjyqtari i Gjykatës Kushtetuese, Fatmir Hoxha. Vendimi u mor sot nga Kolegji i Pavarur i Apelimit. Sipas KPA-së, vendimi i Komisioni i Pavarur i Kualifikimit për shkarkimin e Hoxhës ishte i drejtë.
Komisioni i Pavarur i Kualifikimit më herët vendosi që të shkarkojë me shumicë votash anëtarin e Gjykatës Kushtetuese, Fatmir Hoxha. Ky i fundit, sipas KPK-së, nuk justifikon blerjen e një apartamenti në Tiranë në vlerën e 140 mijë eurove.
Gjyqtari nuk ishte pranishëm në seancë dhe u përfaqësua nga avokati i tij, Julian Mërtiri. Problem për gjyqtarin është apartamenti që ka blerë në Tiranë në vitin 2011 me vlerë 140 mijë e 405 euro. Sipas hetimit të KPK-së, gjyqtari Hoxha, deri në vitin 2011, kishte një pasuri prej 5 milionë lekësh dhe një apartament në Shkodër rreth 65 metra katrorë, ku ishte edhe gjyqtar. Atë vit ai është emëruar anëtar i Gjykatës Kushtetuese, duke u zhvendosur në Tiranë. Hoxha më pas ka shitur asetet në Shkodër dhe ka lidhur kontratë në shkurt të vitit 2011 me një firmë ndërtimi për blerjen e një apartamenti 112,36 metrash katrorë me një vlerë 140,405 euro.
Sipas avokatit, kostoja e lartë e apartamentit në Tiranë e ka detyruar gjyqtarin që të marrë kredi dhe hua nga persona të afërm. Hoxha ka paguar fillimisht 51 mijë euro kapar te firma për apartamentin dhe ka marrë kredi si i pastrehë në shumën 5 milionë lekeshë. Ai ka deklaruar se ka marrë hua 28,500 euro te kunati A.G. dhe kredi tjetër 250 mijë lekësh në një bankë të nivelit të dytë. Hoxha ka shitur apartamentin në Shkodër për 3.4 milionë lekë dhe automjetin e tij në vlerën 1800 euro. Por sipas KPK-së, Hoxha ka 1.7 milionë lekë pasuri me burime të pajustifikuara.
Po kështu, KPK renditi edhe një shumë prej 275 mijë lekësh si e pajustifikuar nga gjyqtari për vitin 2003. Por avokati i gjyqtarit tha në seancë se në atë kohë, gjyqtari është martuar dhe paratë janë dhurata kesh nga të ftuarit në dasmë. Nga ana tjetër, po ditën e djeshme, e pranishme për seancë dëgjimore në KPK ishte gjyqtarja e Gjykatës së Tiranës, Manjola Xhaxho. Kjo e fundit, me një karrierë 16-vjeçare në sistemin e drejtësisë, ka patur zvogëlim të pasurisë nga viti 2003 e deri më sot me 1.9 herë. Xhaxho nuk kishte asnjë problem me pasurinë dhe se zotëronte një apartament 2+1 në Tiranë, që ua kishte dhuruar prindërve të saj me të cilët edhe jeton aktualisht. I vetmi problem, nëse mund të quhet i tillë, për gjyqtaren ishte mungesa e deklaratës së pasurisë e vitit 2006.
Por gjyqtarja në atë kohë ka qenë me studime postuniversitare jashtë vendit dhe kishte marrë edhe leje nga KLD-ja. Gjyqtarja nuk pati asnjë gjetje për raportin e KPK-së dhe kërkoi rikonfirmimin në detyrë.
