Federata Shqiptare e Futbollit ka reaguar në lidhje me arrestimin e trajnerit të kombëtares shqiptare të futbollit Amir Grima. Në reagim FSHF shprehet se janë të prirur të besojnë pafajësinë e trajnerit, pavarësisht se nga policia ai është arrestuar për “organizim të llotarive të palejuara” apo trukim ndeshjesh.
Policia e Shtetit ka marrë një operacion të gjerë së fundmi në qytetin e Shkodrës i ashquajturi operacioni “Oaz”. Interesant është fakti që uniformat blu kanë prekur dhe fushën e sportit, pasi ndër të tjera janë vënë në pranga persona për “organizim të llotarive të palejuara”. Në prangat e Policisë ka rënë as më shumë e as më pak, por vetë trajneri i kombëtares së femrave të Shqipërisë, Amir Grima. Ky i fundit u arrestua në Shkodër.
Arrestimi i trajnerit të kombëtares së femrave për organizim të llotarive të palejuara është një goditje e madhe dhe për këtë ekip, pasi po merrte rezultate të mira me trajnerin Grima. “Mbi të arrestuarit e grupit rëndojnë disa akuza, si organizimi i llotarive sportive të palejuara etj.”, – shkruhet në deklaratën e Policisë.
Reagimi i FSHF-së:
Federata Shqiptare e Futbollit është njohur me ngjarjen e fundit të komunikuar zyrtarisht nga ana e Policisë së Shtetit, për ndalimin e z.Armir Grima, aktualisht trajner i ekipit kombëtar të femrave të futbollit. FSHF në qëndrimin e saj është e prirur të besojë në pafajësinë e plotë dhe mospërfshirjen te trajnerit Armir Grima në rrjetet kriminale për të cilën është ndaluar nga ana e autoriteteve të rendit. FSHF mbetet shumë sensitive karshi kësaj ngjarjeje, por njëherësh është në pritje të zbardhjes së plotë të akuzës që rëndon mbi trajnerin Grima, duke pritur verdiktin e drejtësisë.
Një moment i tillë nuk mund të përbëjë objekt sulmi karshi Armirit, përsa kohë drejtësia nuk ka dhënë vendimin e saj, madje as nuk ka nisur ende të bëjë punën e saj.
FSHF do të ndjekë me shumë qetësi dhe seriozitet ecurinë e kësaj ngjarjeje, duke ftuar njëherësh të gjithë të presin mbylljen e procesit dhe të frenojnë emotivitetin e tyre momental karshi z.Grima që mbetet një familjar i shkëlqyer dhe një njeri me reputacion dhe personalitet të lartë në ambientin e futbollit shqiptar, dhe jo vetëm.