Interi është rikthyer pas 6 vitesh në Champions League dhe menjëherë ka dhuruar një ndeshje spektakolare, apo të “çmendur”. Zikaltërit do të përballen me Barcelonën, një ndeshje mjaft e vështirë, por edhe një përballje me një ish-interist. Do jetë një përballje speciale për Philipe Coutinho, i cili e nisi pikërisht me Inter aventurën e tij në Evropë, para se të transferohej te Liverpool dhe më pas në Barcelonë.
Në lidhje me këtë përballje braziliani u shpreh: “Inter ka qenë skuadra ime e parë në Evropë dhe unë si zikaltër jam ndjerë shumë mirë. Për mua do të jetë një ndeshje shumë e bukur në Champions League të përballem me ta. Do të jetë një emocion i veçantë sepse është hera e parë që luaj kundër Inter”, tha mesfushori i Barçës.
Në lidhje me pretendentët për të fituar Champions League Coutinho u shpreh se vetëm fusha do e tregojë se cili ekip është favorit.
“Champions është gjithmonë shumë e vështirë, prandaj duhet të japim gjithmonë maksimumin për të marrë sa më shumë fitore. Ka skuadra të vështira dhe grupi ynë është i tillë. Inter dhe Tottenham nuk bëjnë shaka. Ndeshja me Inter do jetë vërtetë emocionuese”, përfundoi ai.
