Ish-kreu i SHISH, Fatos Klosi, në një intervistë të dhënë më herët për “Tirana Today”, ka bërë përgjegjës Berishën për vrasjen e Azem Hajdarit. Ai është i mendimit se ish-kryeministri Berisha, ka pasur gisht në vrasjen e tij, pasi ai shfaqte rrezik për të.
Nga vrasja e tij e deri më sot, Berisha me mjaft mjeshtëri ka arritur që ta përdorë figurën e Azemit, duke e kthyer në hero, kjo për përfitime politike. Gjatë intervistës, Klosi rrëfehet se PS nuk kishte asnjë përfitim nga humbja e Hajdarit, por përkundrazi, ajo e pësoi.
Në këtë lojë është futur Berisha, i cili duke ditur problemet me drejtësinë, ia ka hedhur kollaj.
“Partia Socialiste nuk kishte asnjë përfitim nga vdekja e Hajdarit, madje ajo e pësoi. Është e gjitha shkathtësia e Berishës, ai eksperiencën e ka, është i zoti për punë të liga.
Berisha e di më mirë se të gjithë sesa probleme ka me drejtësinë, ndaj ka qenë shumë i kujdesshëm në këtë aspekt. Është marrë me të, dhe çdo gjë e ka bërë pa zhurmë. Berisha është sistematik, njeri që punon fort. Fatkeqësisht, ka mendje të keqe. Ai është nga personazhet më negativ të gjithë kësaj periudhe të gjatë tranzicioni”, është shprehur ai.
Sot, në kuadër të 20-vjetorit të vrasjes së deputetit të PD-së Azem Hajdari, Berisha tha se ai vuri peng fëmijët e tij, ndërsa luftonte për demokracinë.
“Mund të mendoj kush se unë e teprova, me superlativa, ju siguroj që jo. Nëse shkojmë në ditën e tij, nëse kthehemi në dhjetorin e tij, do gjejmë një gjeni të guximit njerëzor, por edhe të vizionit. Askush në histori, rrallë, mund të gjendet një figurë që për një orë të bëhet lider, pozicion të cilin mund ta paguante në çdo moment me jetën e tij.
Këtu janë dëshmitarët, ai ishte më i moshuari, nga ata studentë që hidhnin parullat kundër regjimit dhe diktaturës, kishte dy fëmijë, por u bë lider. Duke vënë peng fëmijët e tij, duke u thënë studentëve, se unë kur tu tradhtoj, ju kam tradhtuar Rudinën dhe Kirin.
Me këtë betim, ky ishte student me familje, njeri i panjohur për atë grup studentësh që e rrethonin, ata e pranuan si lider, i përfaqësoi në takim me kreun e shtetit, i tha se nuk kemi ardhur këtu për një gotë çaj më shumë. Në dy të natës ndodhi ajo që shkelte çdo ligj e traditë, përfaqësuesve të studentëve u doli ministri me brutalitet e batalionit të stampistëve i rrahu, i bëri përshesh”, tha Berisha.
