Spanja është rikthyer të jetë ai ekipi i “frikshëm” që ishim mëshuar të shihnim pak vite më parë, pasi ka shkatërruar 6-0 nënkampionen e botës, Kroacinë. Ndeshja ishte e vlefshme për Ligën e Kombeve Grupi 4 League A. Luis Enrique ka ndërtuar një skuadër me fytyrë tjetër nga ajo e Botërorit, spanjollët duken të uritur dhe në një forma fantastike.
Por ishte një paraqitje e turpshme dhe aspak e denjë e nënkampionëve të botës të cilët jo vetëm që humbën me një rezultat të thellë, nuk arritën të paktën të shënon një gol nderi. Ishte Saul ai që zhbllokoi rezultatin në minutën e 24’.
Më pas është ylli i Real Madrid që lëshon dy të majta nga distanca në 3 minuta dhe të dyja tundin rrjetën.
Rodrigo hap siparin e golave në pjesën e dytë, ndërsa më pas është kapiteni Ramos që shënon të pestin brenda pak minutave. Nuk mund të mungonte dhe Isco, i cili shënon një gol fantastik duke turpëruar keq ballkanasit që vinin me status të madh.
Ndërkohë në ndeshjet e tjera, Islanda është mposhtur nga Belgjika me rezultatin 3-0 falë golave të Hazard dhe Lukaku. Bosnje Hercegovina vetëm në fund të takimit ka gjetur golin e fitores ndaj Austrisë. Finlanda ka mposhtur me rezultatin e ngushtë 1-0 Estoninë në League C teksa Hungaria ka arritur një rezultat të madh ndaj Greqisë teksa ka fituar 2-1 brenda në shtëpi. Moldavia dhe Bjellorusia kanë ndarë nga një pikë në barazimin pa gola, ndërsa San Marino është mposhtur nga Luksemburgu me rezultatin e pastër 3-0.
