Deri në fund të këtij viti numri i mësuesve ndihmës që do të angazhohen për nxënësit me aftësi të veçanta do të shkojë në 700 nga 310 që ishte një vit më parë.
Por nevojat mbeten sërish të mëdha, pasi vetëm në sistemin arsimor bazë janë rreth 3700 nxënës të kësaj kategorie.
Zëvendësministrja e Arsimit, Besa Shahini, shpjegon skemën e shpërndarjes se mësuesve, të cilët në disa shkolla do të duhen të mbulojnë disa klasa.
Nuk e mbulon një mësues një nxënës, do të ketë raste ku në disa shkolla një mësues punon me shumë nxënës deri në 5. Nuk do të punojnë full-time vetëm me një nxënës por do të lëvizë nga klasa në klasë dhe të ndihmojë sipas nevojave, deklaron Shahini.
Nuk do të ketë klasa të veçanta për nxënësit me aftësi ndryshe dhe as kurrikul më të thjeshtuar. Zëvendësministrja thotë se përpos qyteteve të mëdha, nevojat janë të larta edhe në zonat rurale.
Në zona rurale ka shumë nevojë për mësues ndihmës, pasi prindërit jo gjithmonë kanë mundësi të ndihmojnë fëmijët e tyre. Nganjëherë kemi dhe më shumë nevoja për dikë që të ndihmojë fëmijët dhe pjesën e lëvizjes nga shtëpia tek shkolla, sqaron Shahini.
Mësuesit ndihmës iu janë nënshtruar trajnimeve të vazhdueshme nga Instituti i Zhvillimit të Arsimit si dhe organizatave të ndryshme.
Trajnimet bëhen nga Instituti për Zhvillimin Arsimor, është Instituti që gjithmonë bën dhe kurrikulat, trajnimet, merret me zhvillimin arsimor në Shqipëri. Edhe në bashkëpunim me organizata të ndryshme që kanë shumë eksperiencë në këtë fushë, si UNICEF, World Vision etj. Kanë ndërtuar programe që janë të nevojshme dhe për mësuesit që nuk kanë eksperiencë me nxënësit me nevoja të veçanta por edhe për mësuesit që kanë eksperiencë por duan të zgjerojnë njohuritë e tyre dhe të mësojnë mënyrën më të mirë për të ndihmuar secilin nxënës sipas specifikave të tyre, thotë Shahini.
Udhëzimi për mësuesit ndihmës për nxënësit me nevoja të veçanta në instucionet publike të arsimit parauniversitar ka dalë që prej vitit 2014.
Roli i tyre është me rëndësi për arsimimin dhe integrimin e këtyre fëmijëve në ambientet e shkollave dhe jo vetëm.
